Frumsýning á Vísi: Glæsilegt lag og tónlistarmyndband fyrir The Color Run

Strákarnir í StopWaitGo hafa á síðustu vikum samið lag fyrir The Color Run by Alvogen litahlaupið sem fer fram í annað sinn á Íslandi í miðbæ Reykjavíkur þann 11. júní í sumar.

Hugmyndin að því að gera lag kom eftir að StopWaitGo og Áttan ákváðu að gera lag saman og þar sem Nökkvi Fjalar í Áttunni hafði verið einn af kynnum The Color Run á síðasta ári fannst þeim tilvalið að semja lag fyrir hlaupið í ár.

Ásgeir Orri Ásgeirsson ásamt Pálma Ragnari bróður sínum og Sæþóri Kristjánssyni skipa upptökuteymið StopWaitGo.

Saman hefur þríeykið samið fjöldann allan af lögum fyrir íslenska og erlenda flytjendur og skemmst er að minnast þess að þeir sömdu Eurovision lagið sem María Ólafsdóttir flutti fyrir Íslands hönd á síðasta ári, auk þess sem þeir sömdu einnig lag Friðriks Dórs sem endaði í öðru sæti í undankeppninni hér heima.

Þemað í The Color Run by Alvogen í sumar er Tropicolor og eins og nafnið gefur til kynna bætist við suðræn hitabeltisstemning við hina miklu litagleði sem hlaupið felur í sér. Lag strákanna inniheldur sömu suðrænu stemningu og er lagið sungið af Melkorku Sjöfn Magnúsdóttur og Agli Ploder Ottóssyni úr Áttunni.

Lagið er komið í spilun á útvarpsstöðvum landsins og í dag frumsýnir Vísir nýtt tónlistarmyndband við lagið sem sjá má hér að neðan.