Yfirfullur skápur af kjólum

Söngkonan Alda Dís Arnardóttir er mikil kjólakona og segir að fataskápurinn sinn sé nánast fullur af ónotuðum kjólum. Hér leyfir hún lesendum að líta í hann og sjá uppáhaldsflíkurnar sínar og fylgihluti.

Spáir þú mikið í tísku? Ég tek tarnir þar sem ég fylgist mjög vel með en stundum fíla ég ekki alveg það sem er í tísku og þá fylgist ég minna með.

Hvernig myndir þú lýsa þínum stíl? Þægilegt/klassískt/töff/nett/kúl. Hvar kaupir þú fötin þín? Eiginlega bara úti um allt. Ég get samt oft týnt mér í Vero Moda, Zöru og Top Shop en fötin sem ég elska mest eru úr Jör og Kiosk, enda mjög vandaðar og flottar flíkur. Svo elska ég líka Urban Outfitters.

Eyðir þú miklu í föt? Já, frekar miklu. Ég er týpan sem er alltaf að grennast og þyngjast til skiptis með tilheyrandi fatakaupum. Finn mér alltaf einhverja afsökun til þess að kaupa mér nýja flík.

Hver er uppáhaldsflíkin þín? Leður­jakkinn minn! Ég nota hann fáránlega mikið við öll til­efni. Það er algjört „must have“ að eiga góðan leðurjakka í fataskápnum sínum.

Uppáhaldshönnuður? Ég elska litagleðina í KronKron en Hildur Yeoman og Helga Lilja eru líka frábærar og ég held mikið upp á þær.

Hverju verður bætt við í fataskápinn næst? Ég er mikið búin að leita að sumarskóm en hef ekki fundið þá hingað til.

Hver er helsti veikleiki þinn þegar kemur að tísku og útliti? Kjólar! Ég er alveg rosaleg, kaupi kjól alltaf þegar eitthvað er að gerast og nota hann svo einu sinni. Þar af leiðandi á ég allt of mikið af næstum ónotuðum kjólum sem taka allt plássið í fataskápnum mínum.

Notar þú fylgihluti? Ég nota hálsmen einstaka sinnum en er mjög vandlát með skartgripi. Nú orðið nota ég mest hluti sem hafa eitthvert persónulegt gildi. Var alltaf með kreisí eyrnalokka og hálsmen einu sinni en núna hefur það minnkað. Eini skartgripurinn sem ég nota nánast daglega og ég elska meira en allt er Skagen-úrið sem ég fékk frá mömmu og pabba í útskriftargjöf þegar ég varð stúdent.

Áttu þér tískufyrirmynd? Nei, ég get eiginlega ekki sagt það. Mér finnst svo gaman að búa til minn eigin stíl. Maður sér alltaf eitthvað á netinu eða í tímaritum sem manni finnst flott og svo setur maður það saman við eitthvað annað sem maður fílar.

Hvað er fram undan hjá þér? Ég er búin að vera á flakki um landið í verkefni sem heitir Hringferðin. Það er tónleikaferð sem ég er í með félögum mínum og við eigum eftir að fara á nokkra staði núna í maí. En annars verð ég úti um allt í sumar að syngja og semja og hafa gaman.