Mourinho vill hafa Giggs áfram hjá United en ekki sem aðstoðarmann sinn

José Mourino, verðandi knattspyrnustjóri Manchester United, er tilbúinn til að finna starf fyrir Ryan Giggs innan félagsins en hann verður ekki aðstoðarknattspyrnustjóri eins og hann var í stjórnartíð Louis van Gaal.

Þetta hefur Sky Sports samkvæmt heimildum en framtíð Giggs hjá Manchester United er óljós eftir að Van Gaal var rekinn í gær og Mourinho verður ráðinn á næstu dögum.

Jorge Mendes, umboðsmaður Mourinho, hittir Ed Woodward, stjórnarformann United, í London í dag þar sem gengið verður frá samningum. Búist er við snörpum samningaviðræðum þar sem þær hófust fyrr á árinu. Eina stóra málið sem eftir á að ræða er lengd samningsins.

José Mourinho verður áfram með Rui Faria, sinn hundtrygga aðstoðarmann, sem sína hægri hönd. Faria er búinn að vera aðstoðarmaður Mourinho síðan þeir unnu saman hjá Uniao de Leiria árið 2001.

Faria er búinn að elta Mourinho til Porto, Chelsea, Inter, Real Madrid og aftur til Chelsea. Þeir félagarnir hittust á heimili Mourinho í London í gær þar sem þeir eyddu 90 mínútum saman.