Stefnt að vopnahléi í Sýrlandi

Stórveldi heimsins hafa ákveðið að reyna að koma á vopnahléi í Sýrlandi sem á að hefjast eftir eina viku. Þetta var niðurstaða fundar sem fram fór í Þýskalandi í gærkvöldi. John Kerry utanríkisráðherra Bandaríkjanna viðurkennir að áætlunin sé metnaðarfull en að margt geti farið úrskeiðis.

Gert er ráð fyrir að hjálparstofnanir fái þar með næði til að koma nauðsynlegri aðstoð til íbúa landsins sem víða líða mikinn skort. Vopnahléið mun þó ekki ná til stríðsreksturs við Isis samtökin og Al-Nusra hreyfinguna.