Septemberspá Siggu Kling – Hrútur: Ástríðan er allt í kring

Elsku hrausti Hrúturinn minn. Nú er að koma þitt tímabil, þótt sumarið hafi verið ágætt, þá verður þessi vetur þér afdrifaríkur og minnisstæður.

Þú ferð alltaf í betri gír á haustin. Þú færð miklu meiri vinnukraft þegar veturinn heilsar og þú framkvæmir hlutina allt, allt öðruvísi en yfir sumarið.

Þú átt eftir að sjá skýrt hvernig þú ætlar að raða upp næstu mánuðum. Þú átt eftir að sýna mikið hugrekki og ganga eins og sannur forystusauður. Þannig er þér best lýst þótt þér finnist þú kannski ekki vera það, þá er það svoleiðis sem aðrir sjá þig. Þú ert að hefja tímabil þar sem þú ert miklu betur við stjórn en síðustu mánuði. Þú ert búin að halda í þér pirringi gagnvart svo mörgu. En það er eins og sá pirringur fjúki út í veður og vind með haustinu.

Þér finnst þú hafa fengið frelsi, sjálfstraustið eykst og þar af leiðandi verður þú skemmtilegri og því fylgir líka miklu betri líðan. Er það ekki í raun bara það eina sem þú vilt í lífinu? Að líða vel.

Ef þú skoðar líf þitt vel, þá er búinn að vera mikill uppgangur síðasta ár, jafnvel þótt þú hafir þurft að leggja mikið á þig. Nýtt nám, breytingar á vinnustað eða í þínu nánasta umhverfi koma þér svo sannarlega til góða. Þú veist að þú átt það skilið!

Það er gott fyrir þig að minna þig á það á hverjum degi hvað þú átt skilið. Ekki gefa neinn afslátt af því sem þú vilt fá út úr þessu tímabili því þú munt fá það sem þér finnst þú eiga skilið. Þú átt það til að festast svolítið í þráhyggju. Hugsa of mikið um einhvern einn hlut sem skiptir ekki öllu máli og þá villistu svolítið af leið. Gerðu þér grein fyrir þessu og hreinsaðu hugann.

Góð æfing fyrir þig er til dæmis, að minnsta kosti 4 sinnum á dag í fimm mínútur í senn, að anda djúpt og hugsa: ég anda inn hamingju og ég anda út hamingju, ég anda inn orku og ég anda út orku, ég anda inn krafti og ég anda út krafti.

Alltaf þegar þú tekur svona öndunaræfingu skaltu hugsa um hvað þig vantar. Ef þig vantar hamingju, þá skaltu hugsa um hamingju og ef þig vantar frið, þá skaltu hugsa það. Ekki setja neitt orð inn í þetta ferli, bara að breyta þessu gefur þér beina innspýtingu til að leysa vandamálin og láta þér líða betur.

Það er mikil ástríða í kringum þig. Hún flæðir allt í kring. Þú ræður hvert þú beinir þeirri orku. Þú elskar svo mikið og átt skilið þá dásamlegu ást sem mun mæta þér.

Knús og klapp,  þín Sigga Kling

Frægir Hrútar: Hera Björk Þórhallsdóttir söngkona, Silvía Lovetank listamaður, Marta María Jónasdóttir á Smartlandi, Björgvin Halldórsson söngvari, Kári Stefánsson vísindamaður, Vigdís Finnbogadóttir, fyrrverandi forseti, Hugh Hefner, Birgitta Jónsdóttir pírati, Anna Svava Knútsdóttir leikkona, Ólöf Erla, grafískur hönnunarsnillingur, Elton John söngvari, Salka Sól súperdrottning, Þóra í Atlanta, Sigmar Guðmundsson sjónvarpsmaður, Berglind Pétursdóttir, Steinunn Jónsdóttir, söngkona AmabAdamA, Þórhallur Þórhallsson uppistandari, Kristín Þorsteinsdóttir, aðalritstjóri 365 miðla.



Sigga Kling verður í beinni sjónvarpsútsendingu á Vísi klukkan 13:00 í dag og geta lesendur sent inn spurningar í athugasemdarkerfinu hér að neðan. Hægt verður að spyrja Siggu um allt á milli himins og jarðar. Einnig má senda inn spurningar á stefanp@365.is.