Kennarar ganga út í dag

Grunnskólakennarar víðast hvar á landinu ætla að leggja niður störf klukkan 13.30 í dag og þannig sýna samstöðu í kjaradeilu þeirra við sveitarfélögin. Þetta er í annað sinn í þessum mánuði sem kennarar ganga út af vinnustöðum sínum.

Ágúst Tómasson, trúnaðarmaður kennara í Vogaskóla, segist gera ráð fyrir að langflestir kennarar muni leggja niður störf í dag, en þeir munu mæta aftur til starfa í fyrramálið.

„Þetta er ekkert sem er skipulagt nema bara af okkur sjálfum og það er enginn sem heldur utan um þetta. En hljóðið í kennurum er mjög þungt og dapurt núna, sérstaklega eftir þessar uppsagnir sem eru að berast. Það eru tveir skólar sem halda ekki áfram starfsemi með þessu áframhaldi; Seljaskóli og Dalskóli í Úlfarsárdal,” segir Ágúst í samtali við Vísi.

Líkt og Ágúst bendir á hafa verið fjöldauppsagnir í Seljaskóla og Dalskóla, en átján kennarar hafa sagt upp í Seljaskóla og um þriðjungur kennara í Dalskóla, að því er segir á mbl.is. Ágúst segir að fleiri kennarar hyggist segja störfum sínum lausum náist ekki samningar innan tíðar.

Aðspurður segir hann að útganga kennara muni hafa óveruleg áhrif á kennslu. Skólastjórnendur þurfi hugsanlega að grípa inn í í einhverjum tilfellum. „Þetta er það seint um daginn en það er kannski einhver tími sem skólastjórnendur þurfa að dekka fyrir kennsluna,” segir hann.

Kennarar ætla að hittast á samstöðufundum í allflestum hverfum klukkan 13.30.