Villtur fíll gekk berserksgang í Indlandi

Fíll gekk berserksgang í indverska bænum Siliguri í vesturhluta landsins fyrr í dag.

Binay Krishna Barman, ráðherra í Vestur-Bengalhéraði, segir að fíllinn hafi unnið skemmdir á einhver hundruð heimila, verslana og annarra bygginga.

„Fíllinn hafði týnt hjörð sinni, villst og hafnað í Siliguri. Hann olli hræðsluuppþoti í borginni í nærri fimm klukkustundir,“ segir ráðherrann í samtali við AFP.

Íbúar köstuðu steinum og öðru lauslegu í fílinn og reyndi þannig að reka hann á brott.

Að lokum tókst starfsmönnum yfirvalda að skjóta dýrið með deyfibyssu. Hann var svo fluttur aftur inn í frumskóginn.

Siliguri er um 600 kílómetrum norður af Kalkútta. Mikið er um fíla í fjallahéraðinu Darjeeling skammt frá og kemur stundum fyrir að fílar verði fyrir lest þegar þeir standa á teinunum.