Hamborg bannar kaup á kaffihylkjum

Hamborg, næststærsta borg Þýskalands, hefur bannað kaup á kaffihylkjum og öðrum einnota vörum til notkunar í opinberum byggingum í borginni. Bannið er liður í grænum skrefum Hamborgar til að minnka ruslið sem verður til við rekstur borgarinnar.

Umverfisátakið er kynnt í 150 blaðsíðna skýrslu sem ber nafnið „Leiðarvísir að grænum innkaupum“ þar sem kveðið er á um að starfsmenn Hamborgar skuli ekki kaupa „tilteknar mengandi vörur“ fyrir fé borgarinnar.

Bannið tekur einnig til vara á borð við vatn og bjór í plastflöskum, hreinsivörur sem innihalda klór og borðbúnað úr plasti.

Í skýrslunni segir: „Þessar skammtastærðir fela í sér óþarfa auðlindanotkun, búa til mikið rusl og innihalda stundum ál sem er mengandi.“

Jan Dube, talsmaður umverfisdeildar Hamborgarar segir í samtali við BBC að erfitt sé að endurvinna kaffihlykin því þau oftar en ekki gerð úr blöndu af plasti og áli. „Þetta eru 6 grömm af kaffi í 3 gramma þungum umbúðum. Við í Hamborg erum þeirrar skoðunar að skattfé borgaranna skuli ekki varið í slík innkaup.“