Fundu sprengju við tjaldstæðið í Borgarnesi

Sprengjusveit Landhelgisgæslunnar var kölluð út í dag eftir að tilkynning barst um sprengju nálægt tjaldstæðinu í Borgarnesi. Þetta staðfestir lögregla í samtali við Vísi.

Sprengjan fannst í gær þegar björgunarsveitamenn voru í óða önn við að undirbúa flugeldasýningu fyrir lokakvöld Unglingalandsmóts Ungmennafélags Íslands. Sprengjusveit Landhelgisgæslunnar rannsakaði sprengjuna og nú á áttunda tímanum stóð til að eyða henni. Talið er að sprengjan sé úr heimstyrjöldinni síðari.

Lögregla gat ekki veitt upplýsingar um hvort nokkur hætta hafi stafað af sprengjunni.