Minni verslun vegna breytts kortatímabils

Ekki eru lengur auglýst ný greiðslukortatímabil snemma í desember líkt og tíðkaðist áður. Í dag eru það bankarnir sem ráða kortatímabilum.

Jón Björnsson, forstjóri Festar sem rekur meðal annars Krónuna, segir fyrirtækið finna fyrir minni verslun þessa dagana þar sem nýtt greiðslukortatímabil hefst 22. þessa mánaðar fyrir viðskiptavini Arion banka og Íslandsbanka og 27. desember fyrir viðskiptavini Landsbankans. Áður fyrr hófust ný kortatímabil fyrr í mánuðinum.

Sökum þessa halda viðskiptavinir að sér höndum í jólainnkaupum og vilja frekar freista þess að kaupa inn á nýju kortatímabili.

„Við finnum það eðlilega að fólkið okkar er spurt hvenær nýtt kortatímabil hefjist. Ég álít að það sé að einhverju leyti af því að fólk vill vita hvenær það gæti borgað reikninginn fyrsta febrúar í stað fyrsta janúar,“ segir Jón. Áhrifin séu þó ekki stórkostleg.

Þannig segir Jón að fólk hafi áður fyrr haft rýmra greiðslufyrirkomulag. Nú hafi bankarnir það í sínu valdi að ákveða fyrirkomulagið.

„Þú þarft að snúa þér til bankans núna og bankarnir hafa greinilega ekki hugsað út í þetta eins og Borgun og Valitor hafa gert í gegnum árin. Þau hafa verið að rýmka um fyrir greiðslufyrirkomulagi hjá neytendum,“ segir Jón. Hann segir gamla fyrirkomulagið betra fyrir kaupmenn og neytendur. „Það sem er betra fyrir neytendur er yfirleitt betra fyrir kaupmanninn. Það fer eiginlega alltaf saman,“ segir hann.

Í viðtali við Bítið á Bylgjunni í gær sagði Bergþóra Karen Ketilsdóttir, forstöðumaður viðskiptavers hjá Borgun, að áður fyrr hafi bara verið eitt ákveðið kortatímabil. Frá átjánda degi mánaðar til sautjánda dags þess næsta. Þetta hafi hins vegar breyst smám saman og nú séu mismunandi kortatímabil.

„Þetta er barn síns tíma. Það eru aðrar lausnir sem koma í staðinn,“ sagði Bergþóra Karen og nefndi hún til að mynda jólalán Borgunar, greiðsludreifingu og tímabundna hækkun á heimildum korthafa. „Það eru alltaf til leiðir til að auðvelda viðskipti.“

Fréttin birtist fyrst í Fréttablaðinu.