Samkomulagið frá París geirneglt í lögum

Loftslagssamningur Sameinuðu þjóðanna – eða Parísarsamkomulagið eins og það er oft kallað – verður bindandi samkvæmt alþjóðalögum innan mánaðar, eða áður en 22. loftslagsráðstefna Sameinuðu þjóðanna hefst í Marokkó þann 7. nóvember næstkomandi.

Nú liggur fyrir að 79 þjóðir af þeim 197 sem komu að samþykkt Parísarsamkomulagsins frá því í desember í fyrra hafa fyrir sitt leyti fullgilt samninginn – en þessar 79 þjóðir standa að baki 56,75 prósentum af heildarlosun gróðurhúsalofttegunda í heiminum.

Eins og oft hefur komið fram var hluti af samningsgerðinni að samningurinn hlyti lagalegt gildi þegar 55 ríki með 55 prósent af losun á heimsvísu hafa fullgilt hann.

Árni Finnsson, formaður Náttúruverndarsamtaka Íslands, segir að í desember í fyrra hafi loks náðst viðunandi árangur eftir áratuga samningaviðræður á vettvangi Loftslagssamnings Sameinuðu þjóðanna.

Ársfundur aðildarríkja samningsins í París var sá 21. í röðinni og á ýmsu hafði gengið án viðunandi árangurs. Niðurstaðan varð Parísarsamkomulagið. Þá var næsti hjalli, undirritun samkomulagsins sem fram fór í New York í apríl og því næst lögleiðing hans í höfuðborgum hvers aðildarríkis. Þessi ferill hefur gengið hraðar en nokkur dæmi eru um í sögu Sameinuðu þjóðanna.

„Þar með hefur yfirlýst markmið Frakklandsforseta, Bandaríkjaforseta og Ban Ki-moons, aðalritara Sameinuðu þjóðanna, náðst. Sagan gaf ekki tilefni til slíkrar bjartsýni,“ segir Árni og bætir við að Frakkland, Bandaríkin, Kína, Indland, Brasilía, og Mexíkó, auk ríkjahópa á borð við Evrópusambandið, Afríku­ríkin og Bandalag smá-eyríkja höfðu lagt gríðarlega mikla vinnu í að ná ásættanlegri lausn. Niðurstaðan – Parísarsamkomulagið – varð enn betra og enn metnaðarfyllri niðurstaða en nokkur hafði þorað að vona, er mat Árna.

„Það segir þó sitt um stöðu mála að þrátt fyrir góðan árangur í París mun markmið aðildarríkja Parísarsamkomulagsins, um að halda hækkun meðalhitastigs jarðar innan við tvær gráður og í besta falli innan við 1,5 gráður, ekki nást. Verði ekki betur að gert mun meðalhitastig hækka um að minnsta kosti 2,7 gráður sem er langt umfram hættumörk,“ segir Árni Finnsson.

Fréttin birtist fyrst í Fréttablaðinu.