Óttast að yfirvöld haldi áfram að stunda ólögmætar símhleranir

Björgvin Mýrdal fagnar ekki niðurstöðu dómsmáls sem hann höfðaði á hendur íslenska ríkinu vegna ólögmætrar símhlerunar þrátt fyrir að hafa fengið dæmdar miskabætur. Hann segir niðurstöðuna fremur týpíska og hefur áhyggjur af því að ekkert breytist hvað varðar vinnuaðferðir lögreglunnar í fíkniefnamálum.

„Manni líður bara eins og það hafi verið brotið á manni,“ segir Björgvin spurður um hvernig tilfinning það sé að komast að því að hlustað hafi verið á hvert einasta samtal í síma sem maður átti yfir nokkurra mánaða skeið.

Vísir greindi frá málinu í gær en íslenska ríkið var dæmt til að greiða honum  600 þúsund krónur í miskabætur vegna ólögmætra símhleranna. Málið hófst á sameiginlegri rannsókn nokkurra lögregluliða á Norðurlöndunum á ætluðum innflutningi á miklu magni fíkniefna frá Spáni til Danmerkur, Íslands og Noregs árið 2012.

Einn hinna grunuðu í fíkniefnamálinu er bróðir Björgvins og var aflað heimildar til að hlusta á síma sem bróðirinn var með í sínum vörslum. Hlustun hófst 25. maí árið 2012 en síðar kom í ljós að símanúmerið var í eigu Björgvins en ekki bróður hans og var þá fengin ný heimild héraðsdóms 22. júní sama ár til að hlera númer hans. Þessar hleranir stóðu á grundvelli tveggja annarra úrskurða, 19. júlí og 17 ágúst, til 14. september 2012. Manninum var tilkynnt um þessar hleranir 12. desember sama ár.

Héraðsdómur Reykjavíkur taldi ekkert í málinu benda til þess að lögregla hafi haft ástæðu til að hlusta og hljóðrita símtöl Björgvins eftir 20. júlí árið 2012 og líkur standa raunar til þess að hætta hefði átt hlustun mun fyrr, jafnvel fljótlega eftir að hún hófst 22. júní sama ár. Björgvin segir að sér finnist enginn bera ábyrgð í málinu, hvorki dómarinn sem veitti heimildina til hlerunarinnar né lögreglumenn.

„Þetta er samþykkt af dómara á stórfurðulegan hátt. Þeir samþykkja allt sem kemur inn á þeirra borð,“ segir Björgvin.

„Ég vonaði að þetta mál myndi breyta einhverju, maður er ekki að þessu fyrir peningana. Það er á hreinu. Ég vil að þeir beri ábyrgð. Svona aðgerðir kosta mikið. Það er verið að fara fram á heimildir aftur og aftur og það er ekkert á bakvið þessar heimildir.“

Þá spyr hann á hverju ákvörðun um skaðabætur byggi.

„Þetta er bara tala út í loftið.“ Björgvin bíður enn meðferðar máls sem er fyrir dómstólum og varðar ólögmæta handtöku að hans mati. Hann neitaði að leyfa lögreglu að leita á sér í Þjóðhátíð í Vestmannaeyjum og var handtekinn í kjölfarið.