Sigmundur Davíð áfram í oddvitasætinu

Sigmundur Davíð Gunnlaugsson, fyrrverandi formaður Framsóknarflokksins, verður áfram oddviti Framsóknarflokksins í Norðausturkjördæmi í komandi alþingiskosningum. Þetta kemur fram í Morgunblaðinu í dag.

Þar er einnig greint frá því að tal um að Sigmundur Davíð og hugsanlega Gunnar Bragi Sveinsson, sjávarútvegs- og landbúnaðarráðherra, myndu kljúfa flokkinn eigi ekki við rök að styðjast.

Sigmundur Davíð beið lægri hlut fyrir Sigurði Inga Jóhannssyni forsætisráðherra í formannskosningum flokksins um liðna helgi. Ólga hefur verið innan flokksins en Sigurður Ingi fullyrðir að nú, eftir kosningarnar, taki öldur að lægja. Hafist verði handa strax við að sameina flokkinn.

Haft var eftir Sveini Hirti Guðfinnssyni, formanni Framsóknarfélagsins í Reykjavík, í Fréttablaðinu í dag að svindlað hafi verið í formannskosningu flokksins, að því er hann fullyrti. Sagði hann fjölda fólks hafa sagt sig úr flokknum og að erfitt verið að ná honum saman í eina heild aftur.