Maíspá Siggu Kling – Meyja: Ríst upp eins og fuglinn Fönix!

Elsku Meyjan mín. Þú ert svo mikið að laga sjálfa þig til og að hressa upp á umhverfið í kringum þig. Og þú ert eitthvað svo dásamlega komin á fullt í vorverkin.

Það er mjög mikilvægt að þú búir ekki til í huganum á þér hvað annað fólk er að hugsa og búir til einhverja hræðslu í sambandi við fólk sem þú hefur í raun og veru ekki hugmynd um hvað er að hugsa.

Það er miklu betra að spyrja bara hreint út ef það er eitthvað sem þú ert að velta fyrir þér og þér finnst þú þurfa að vita.

Þú þarft ekki að biðja neinn um leyfi til þess að vera besta útgáfan af þér og þó að þú stígir óvart á einhvern í leiðinni þá þarftu bara að segja fyrirgefðu og halda ótrauð áfram. Það er nefnilega alveg magnað hvað það orð er merkilegt og hefur mikla þýðingu.

Það verða svo skemmtilegar tilviljanir í kringum þig, en það eru í raun ekki tilviljanir heldur er verið að sýna þér hvað þú ert búin að standa þig vel undanfarið. Það er verið að sýna þér hvað þú ert góð fyrirmynd og það er svo merkilegt að þegar þú sérð sjálf að þú ert orðin þín eigin fyrirmynd. Þá sérðu líka að þú vilt alls ekki vera nein önnur en þú ert, svo til hamingju með það!

Aflið þitt verður svo mikið að þú verður eins og fuglinn Fönix. Þú ríst upp úr eldinum og verður full af stolti. Láttu ekki of mikið af tilfinningum flækjast fyrir þér og einfaldaðu lífið þitt, það eru skilaboðin fyrir þinn maímánuð.

Venus er inni í orkunni þinni. Ef þig vantar ástina inn í líf þitt eða vilt skerpa á ástinni sem er þegar til staðar þá skalt þú nýta þér það.

Lífið er dásamlegt,

þín Sigga Kling

Frægar meyjur: Ragna Lóa Stefánsdóttir íþróttakona, Manuela Ósk fyrirsæta, Björk Eiðsdóttir ritstýra, Andrea fatalistamaður, Claudia Schiffer fyrirsæta, Edda Björgvinsdóttir leikkona, Eva Dögg Sigurgeirsdóttir, ritstjóri og tískugúrú, Herdís Jóhannesdóttir athafnakona, Beyoncé Knowles söngkona, Gylfi Þór Sigurðsson, Eiður Smári Guðjohnsen, Sigrún Ósk Kristjánsdóttir sjónvarpskona, Annie Mist crossfittari, Logi Pedro Stefánsson tónlistarmaður.