Maíspá Siggu Kling – Vog: Hafðu skýr skilaboð í ástinni

Elsku Vogin mín. Þú átt eftir að fara á svo skemmtilegu brokki inn í sumarið. Það er svo margt að gerast hjá þér að það er eins og þú sért stödd í lest, horfir út um gluggann og sjáir lífið og umhverfið þjóta fram hjá þér á fullu spani.

Þú nærð svo góðri tengingu við Móður jörð og finnur kraftinn frá henni og nærð að komast í andlegt jafnvægi. Og það er sko alveg dásamlegt og mikilvægt.

Þú hættir að láta aðra koma þér í uppnám og verður með skýr skilaboð til sjálfrar þín um hvernig þú ætlar að leysa þetta sumar.

Þú átt eftir að finna að þú ert hamingjusöm og ánægð með þær ákvarðanir sem þú tekur í þessum mánuði og það á eftir að hjálpa þér mikið til þess að ráða fram úr erfiðum og flóknum verkefnum.

Þú átt eftir að taka þátt í lífinu af miklum eldmóð og ferðast mikið yfir sumarmánuðina og vittu til; þú ert bara í startholunum.

Þú málar stundum skrattann á vegginn, elsku Vogin mín, og ert alveg sannfærð um að allt sé að fara til andskotans. Það er bara blekking hugans og ekki dvelja við það hugarangur lengur en þú nauðsynlega þarft.

Þú hefur val og þú getur verið svo asskoti ákveðin og skemmtileg þegar þú velur jákvæðari leiðina. Það er svo mikið hugrekki sem brýst út hjá þér á næstunni og þú lætur óöryggið sigla lönd og leið.

Þú þarft ekki að láta stjórnast af peningum því þeir koma og ekki þaðan sem þú bjóst við. Peningar eru bara orka, og það er alveg hægt að kaupa hamingjuna, allavegana í stutta stund.

Þú átt eftir að elska af mikilli ástríðu en þú átt það líka til að draga þig í hlé svo að sá sem þú elskar veit ekki alveg hvað þú ert að meina. Hafðu skýr skilaboð í ástinni, það er það eina sem þú þarft.

Hversu gott er þetta líf?

Þín Sigga Kling

Frægir í voginni: Glúmur Baldvinsson stjórnmálafræðingur, Hjalti flugþjónn, Ingi í Sign, Jón Axel Ólafsson athafnamaður, Matt Damon leikari, Íris Berg, fatahönnuðurinn minn, Mary Poppins, Steingrímur Sævarr Ólafsson fjölmiðlaráðgjafi, Svanhildur Hólm Valsdóttir, aðstoðarmaður ráðherra og sjónvarpskona, Hanna Birna Kristjánsdóttir þingkona.