Rjúpnaskytturnar tvær sem leitað hefur verið á Snæfellsnesi frá því í gærkvöldi fundust heilar á húfi rétt fyrir klukkan tvö í dag. Mennirnir eru þokkalega á sig komnir miðað við aðstæður en bæði blautir og kaldir.
Samkvæmt upplýsingum frá Slysavarnafélaginu Landsbjörg höfðu mennirnir leitað sér skjóls undan veðrinu ofarlega í hlíðum Gráborgar, ofan Hestdala sem ganga inn af Kolgrafarfirði.
Mennirnir höfðu verið í sambandi við Neyðarlínuna í dag en vissu ekki hvar þeir voru niðurkomnir. Þeir gerðu björgunarsveitafólki vart við sig með því að blása reglulega í neyðarflautu sem þeir höfðu meðferðis.
Leitarskilyrði voru léleg í dag, lítið skyggni og leiðinlegt veður. Gera má ráð fyrir því að það taki nokkrar klukkustundir að komast aftur til byggða miðað við aðstæður á leitarsvæðinu. Alls komu rúmlega tvö hundruð manns að leitinni.
Mennirnir fundnir heilir á húfi
Tengdar fréttir
Rjúpnaskytturnar látið vita af sér en eru enn ófundnar
Mennirnir sem leitað er á Snæfellsnesi eru kaldir og hraktir. Útlit fyrir að veður versni frekar en hitt.
Rjúpnaskytta saknað: Erfiðar aðstæður til leitar á Snæfellsnesi
Liðsauki frá höfuðborgarsvæðinu tekur nú þátt í leitinni.
