Opið bréf til formanns skóla- og frístundaráðs

Sæll Skúli.

Eftir lestur greinar sem þú birtir í Fréttablaðinu þann 9. maí get ég ekki lengur orða bundist. Ég er starfandi dagforeldri og hef haft leyfi frá borginni til þrjátíu ára. Í ritum þínum virðist þú ekki vita af þeirri þjónustu sem dagforeldrar hafa upp á að bjóða og virðist ekki vita af þeirri stétt. Alla vega erum við aldrei nefnd þegar verið er að ræða um vistun barna undir tveggja ára aldri. Gott dæmi um hvernig þið vinnið hjá leikskólasviði er þegar dagforeldrar lesa í blöðum eða heyra í fjölmiðlum um það að 18 mánaða börn fara í leikskóla í ágúst án þess svo mikið að kynna það fyrir dagforeldrum. Á þessum tíma hafa dagforeldrar verið að skipuleggja starfið fyrir haustið og reikna með þeim börnum sem áætlað er að taka inn á leikskólana.

Enn og aftur lesum við um breytingar í blöðum. Þú talar um að lengja fæðingarorlof í 12 mánuði og að börn verði tekin inn á leikskóla undir 18 mánaða aldri ef pláss gefst. Félög dagforeldra hafa ítrekað krafið Reykjavíkurborg um hærri niðurgreiðslur til foreldra með börn í vistun hjá dagforeldrum en ávallt fengið þau svör að engir peningar væru til. Þarna er ekki verið að hlúa að barnafjölskyldum eins og fram kemur í pistlinum í Fréttablaðinu. Einarður vilji er hins vegar til staðar hjá ykkur í meirihluta borgarinnar að setja ómálga og ósjálfbjarga börn inn á stofnun, þar sem hætturnar bíða þeirra, ef tekið er mið af því öryggi sem þau búa við í heimilislegu umhverfi hjá dagforeldrum.

Nú var borgin (skóla- og frístundasvið) að senda dagforeldrum könnun sem þeir eiga svara m.a. um meira samstarf. Með þessu er verið að draga dagforeldra á asnaeyrunum með því að borgin vill fara að gæðastýra starfseminni og ekki vantar að alltaf er verið að tala um meira og meira samstarf. Finnst þér Skúli þetta boðlegt heilli starf­stétt, sem telur yfir 200 manns hér í Reykjavík og þú virðist ekki vita um.

Ég skora á þig Skúli að bjóða dagforeldrum til fundar við þig, þar sem þú skýrir út fyrir þeim hvar þeir peningar séu til, sem hægt er að nota í þessar breytingar sem þú hefur í hyggju að gera á vistun ungbarna.

Það kæmi mér ekki á óvart að dagforeldrar færu að skila inn leyfum sínum til að finna öruggara starfsumhverfi og leyfðu þér að fá í fangið þau börn sem annars yrðu vistuð hjá þeim.

Þessi grein birtist fyrst í Fréttablaðinu.