Var látinn þegar bifreiðin fannst

Ökumaður bifreiðarinnar, karlmaður á sextugsaldri, sem fór í höfnina á Hvammstanga fyrr í dag var látinn þegar bifreiðin fannst. Þetta kemur fram í fréttatilkynningu frá lögreglunni á Norðurlandi vestra.

Tilkynning um atvikið barst á fimmta tímanum í dag og var strax kallað á tiltæka viðbragðsaðila á svæðinu. Kafari frá Brunavörnum Húnaþings vestra fann bifreiðina skömmu fyrir klukkan fimm á hafsbotni um þrjátíu metra frá bryggjunni. Enn fremur aðstoðuðu kafarar frá Slökkviliði höfuðborgarsvæðisins en þeir voru fluttir á staðinn með þyrlu Landhelgisgæslunnar.

Lögreglan á Norðurlandi vestra annast rannsókn málsins.