Þrjár óskir

Ég á mér ósk um að allir á Íslandi fái að njóta danslistar, leiklistar og allra þeirra sviðslista sem víkka hugann, gerir heiminn stærri og hugmyndirnar um lífið og tilveruna fjölbreyttar og ríkari. Að barn hvar sem það er búsett á landinu geti upplifað, séð og reynt töfraheim sviðslistanna.

Í dag er aðgangur að fjölbreyttum sviðslistum takmarkaður á landsbyggðinni.

Ég á mér ósk um að á Íslandi getum við menntað sviðlistafólk á breiðu rófi sviðslistanna til þess takast á við samtíma sinn og að menntun þeirra sé metin til jafns við annað háskólanám.

Í dag er námsframboð í sviðslistadeild takmarkað vegna skort á fjárframlögum og nemendur í sviðslistum borga há skólagjöld til Listaháskólans svo hann geti staðið undir þeirri grunnþjónustu sem hann býður.

Ég á mér ósk um að aðstaða til sviðslistamenntunar á Íslandi sé sambærileg við það sem gengur og gerist á Norðurlöndum, að nemendur geti unnið sviðsverk á frambærilegum leiksviðum og dansgólfum, í salarkynnum sem rúmar stefnumót listamannanna við áhorfendur.

Í dag fer kennsla í sviðslistum á háskólastigi fram í óhentugu húsnæði á þremur stöðum í borginni, engin aðstaða er til þess að bjóða áhorfendum á nemendasýningar dansbrautar og leikhús deildarinnar tekur aðeins 50 áhorfendur í sæti.

Hugvit, orka og hæfileikar

Þetta eru aðeins brot af mínum óskum um framtíð sviðslista og sviðslistamenntunar á Íslandi. Það er skrýtið að láta sig dreyma um hluti sem eru sjálfsagðir því allar þessar óskir gætu svo auðveldlega ræst ef nægilegu fjármagn væri veitt til starfsemi Listaháskólans Íslands. Sviðslistadeild Listaháskólans býr yfir miklum mannauði, metnaði og hugmyndaauðgi og getur borið sig saman við sambærilegar stofnanir í nágrannalöndunum varðandi flest annað en aðstöðu. Deildin er í öflugu samstarfi við starfsumhverfi sviðslista á Íslandi og láta útskrifaðir nemendur til sín taka á fjölbreyttum vettvangi sviðslista, fjölmiðla, menntunar og kvikmynda. Við erum rík af hugviti, orku og hæfileikum en pyngjan er tóm og takmarkar það mjög umsvif og möguleika til framþróunar.

Ef vilji er fyrir hendi væri hægt að kenna allar greinar sviðslista við Listaháskólann, á bakkalárstigi, meistarastigi og doktorsstigi: Leikstjórn, danssmíðar, leikritun, sviðslistafræði, leikmyndahönnun, búningahönnun, förðun, ljósa- og hljóðhönnun, sýningarstjórn og leikhústækni.

Ef vilji er fyrir hendi gæti Listaháskólinn átt fullbúið leikhús og danssal til sýningar á nemendaverkum.

Ef vilji er fyrir hendi gæti sviðslistdeildin Listaháskólans rekið útibú í hverjum landsfjórðungi, farið í leikferðir í kringum landið og unnið þar verkefni í tengslum við samfélagið, haldið námskeið og kynningar.

Óskir geta ræst, ef vilji er fyrir hendi.

Í aðdraganda kosninga spyr ég þá sem ætla sér að setjast í ríkisstjórn: Er vilji fyrir hendi?