Eldur á hóteli í Dalasýslu

Mikill eldur kom upp á Hótel Ljósalandi, í Saurbæ í Dalasýslu um fimmleytið í nótt. Allt tiltækt slökkvilið í Dalabyggð hefur barist við eldinn í morgun, með aðstoð slökkviliðsmanna frá Hólmavík og Reykhólum. Sæmundur Jóhannsson, aðstoðarslökkviliðsstjóri í Dalabyggð, er á vettvangi.

„Það er unnið að því að slökkva í glæðunum,“ segir Sæmundur. „En hluti af húsinu er bara fallinn.“

Gistirými fyrir sextán manns eru á hótel Ljósalandi en verið er að stækka hótelið og kom eldurinn upp í nýbyggingu sem enn hefur ekki verið tekið í gagnið.

Stöð 2 tók árið 2014 viðtal við unga parið sem flutti úr borginni og opnaði Hótel Ljósaland:

Sæmundur veit ekki til þess að neinn hafi verið í húsinu þegar eldurinn kom upp. Heimamenn á næsta bæ urðu eldsins varir þegar þeir komu heim af þorrablóti.

„Það var allavega enginn inni þegar við komum á staðinn,“ segir Sæmundur.

Tjónið er mikið, bæði vegna reyks og elds en ekki er ljóst hvað varð til þess að eldurinn kviknaði. Eldsupptök verða rannsökuð, að sögn Sæmundar.