Þegar takan dettur niður

Þrátt fyrir að veiðin núna miðað við sama tíma í fyrra sé um 4.000 löxum meiri datt takan niður í mörgum ám í nokkra daga.

Þetta var sérstaklega áberandi á vesturlandi en frá Leirvogsá að Dölunum datt takan niður í einhverja daga og fór undir því sem eðlilegt má teljast á þessum árstíma.  Yfirleitt gerist þetta í byrjun ágúst en ekki í júlí og það sem einhverjir haf skotið á sé að laxinn hafi byrjað að ganga svo snemma í árnar að hann sé að taka þetta tregðutímabil núna í samræmi við að hafa mætt rúmlega tveimur vikum fyrr en menn áttu von á.  Ekki leggjum við dóm á þessu kenningu en athyglisverð er hún engu að síður.

Þetta gerist bara stundum í ánum og meira segja stundum bara milli hylja.  Eina stundina er einhver veiðistaður að gefa mönnum flotta veiði en þremur veiðistöðum neðar er kannski annar hylur þar sem ekkert gerist og það er engin leið að útskýra af hverju þetta gerist.  Ástæður sem eru oft nefndar og margar hafa vissulega mikið að segja með tökuviljan er t.d. hitastig á ánni, skýjað eða sól, rok eða logn, heitt eða kalt úti, vestan eða austan átt, mikið vatn eða lítið vatn, úrhelli eða staða himintunglana.  Óvissuþættirnir eru þannig vissulega margir það er nú einu sinni eitt af því sem gerir veiðina jafn spennandi og raun ber vitni.