Rannsaka skjálftavirkni við Húsmúla

Sérfræðingar Orkuveitu Reykjavíkur og Orku náttúrunnar fara nú yfir skjálftavirkni helgarinnar við Húsmúla á Hengilssvæðinu. Sérfræðingar á Veðurstofunni og í vísindasamfélaginu koma einnig að greiningunni. Þetta kemur fram í tilkynningu frá Orkuveitu Reykjavíkur.

Markmiðið með greiningunni er að komast að því hvort að skjálftarnir tengist niðurdælingu vinnsluvatns frá Hellisheiðarvirkjun. Breytingar á skipulagi niðurdælingar geta orsakað svokallaða gikkskjálfta. Engar breytingar hafa hins vegar verið gerðar á niðurdælingunni upp á síðkastið og kallar hrinan því á ítarlega greiningu allra gagna.

Niðurdæling vatns hefur tvíþættan tilgang. Annars vegar að draga úr umhverfisáhrifum á yfirborði, með því að vinnsluvatnið er ekki losað þar. Hins vegar eflir niðurdælingin sjálfbærni nýtingu jarðhitaauðlindarinnar þegar vinnsluvatni er skilað aftur niður í jarðlög þar sem það hitnar á ný.

Vatnið getur virkað eins og smurning

Í tilkynningu Orkuveitunnar kemur fram að við borun á jarðhitasvæðum sé leitast við að finna lekar jarðmyndanir eins og sprungur og misgengi. Sé spenna í sprungunum sem dælt er niður í getur vatnið virkað líkt og smurning þannig að spennan losnar með skjálftum í nánasta umhverfi við niðurdælinguna. Slíkir skjálftar eru kallaðir gikkskjálftar og eru oftast það smáir að þeir finnast ekki.

Frá því að Hellisheiðarvirkjun var tekin í notkun árið 2006 hefur vinnsluvatni frá virkjuninni verið dælt niður í jarðhitageymi. Dælt er niður á tveimur stöðum, við Gráuhnúka og Húsmúla. Um 700-800 lítrum er dælt niður á sekúndu.

Árið 2011 urðu gikkskjálftar við Húsmúla, en þá hafði vatnið virkað eins og smurning og losað um spennu í jarðlögunum. Í kjölfarið var tekið upp verkleg um að forðast snöggar breytingar á högun niðurdælingar og að láta almenning og yfirvöld vita fyrir fram þegar breytingar væru gerðar á niðurdælingu.