Rússar þegar farnir að undirbúa brottför

Svo virðist sem Rússar séu þegar farnir að undirbúa brottför sína frá Sýrlandi sem Vladímír Pútín forseti tilkynnti um í gær. Yfirlýsingin kom flestum gjörsamlega í opna skjöldu en Rússar og Sýrlendingar segja hana hafa verið tekna í fullu samráði þjóðanna tveggja.

Rússar, sem hafa aðstoðað Sýrlendinga í hernaði gegn uppreisnarmönnum síðustu mánuði, segja að takmörkum sínum hafi verið náð. SKY fréttastofan greinir síðan frá því að strax í morgun hafi menn hafist handa við að undirbúa herþotur undir langflug til rússneskra herstöðva. Um leið og Pútín greindi frá ákvörðun sinni sagði hann að aukinn kraftur yrði nú settur í að koma á friði í Sýrlandi með pólitískum leiðum.