Ekki lostugt athæfi að pissa fyrir framan lögreglu

Hæstiréttur hefur sýknað karlmann af ákæru um brot gegn blygðunarsemi þriggja lögreglumanna með því að hafa handleikið á sér getnaðarliminn fyrir framan þá. Maðurinn var dæmdur í þriggja mánaða fangelsi í Héraðsdómi Reykjavíkur í mars í fyrra. Hann neitaði þó að hafa gert annað en að hafa kastað af sér vatni.

Í ákærunni segir að maðurinn hafi hinn 14.desember 2013, við skemmtistaðinn Spot í Kópavogi, staðið fyrir utan húsið, horft á lögreglumennina og sveifla getnaðarlim sínum í hringi. Það hafi hann gert í nokkra stund á meðan lögreglubifreiðinni hafi verið ekið um bílaplanið. Í þann mund sem lögreglubifreiðin hafi verið stöðvuð hafi maðurinn byrjað að strjúka getnaðarliminn fram og til baka. Hann hafi ekki sést kasta af sér þvagi þann tíma sem hann hafi handleikið getnaðarliminn fram og til baka. Þá hafi hann ekki sést kasta af sér þvagi þann tíma sem hann hafi handleikið getnaðarliminn í augsýn lögreglumannanna.

Maðurinn var sýknaður á þeim forsendum að maðurinn hefði neitað að hafa gert annað en að handleika á sér getnaðarliminn er hann var að kasta af sér vatni og í kjölfar þess. Ákæruvaldið hafi ekki mótmælt því og því talið að háttsemi mannsins fæli ekki í sér lostugt athæfi sem hefði getað sært blygðunarsemi lögreglumannanna.