Guðmundur: Getur vel farið svo að ég hætti í handbolta

„Þetta var mjög erfið ákvörðun og ég var búinn að velta þessu lengi fyrir mér,“ segir Guðmundur Þórður Guðmundsson í samtali við Vísi en það var tilkynnt í morgun að hann muni hætta með danska landsliðið á næsta ári.

Samningur Guðmundar við danska handknattleikssambandið rennur út þann 1. júlí á næsta ári og þá áætlar Guðmundur að stíga frá borði.

„Það er ekki langt síðan ég tók þessa ákvörðun en ég hef verið að velta þessu fyrir mér síðan að Ólympíuleikunum lauk. Það er margt jákvætt við starfið og því er erfitt að taka svona ákvörðun.“

Sjá einnig: Valdabarátta í danska landsliðinu: Spurði hvort ætti að reka Guðmund daginn eftir úrslitaleikinn

Guðmundur segist hafa verið að ræða við forkólfa danska sambandsins um framhaldið þó svo það hafi ekki verið formlegar samningaviðræður.

„Ég mun ekki skýra það í þaula af hverju ég hætti. Maður fer auðvitað yfir sín mál og hvað maður vill gera í framtíðinni er maður tekur svona ákvörðun. Ég mat stöðuna þannig fyrir sjálfan mig að mig langar að gera aðra hluti.“

Þó svo Guðmundur hafi náð að landa gulli á Ólympíuleikunum með Dönum þá hefur gustað um hann í starfi. Starf hans var meðal annars sagt standa mjög tæpt fyrir leikana í Ríó.

„Það er ekkert óeðlilegt í þessu starfi að það gusti aðeins um. Það eru gríðarlega miklar kröfur gerðar til liðsins og mín. Það er mikil umfjöllun um landsliðið og þá getur hún stundum verið svolítið ýkt. Ég get vel við unnið. Ég hef stýrt liðinu í 51 leik og aðeins tapað átta. Ég held að þetta vinningshlutfall teljist nokkuð gott. Ég er stoltur af mínu starfi.“

Sjá einnig: Guðmundur hafði ekkert að gera með afsögn Wilbek

Stóri stormurinn kom þó eftir leikana í Ríó er danskir miðlar fóru að greina frá því að Ulrik Wilbek, fyrrum landsliðsþjálfari Danmerkur, hefði reynt að bola Guðmundi úr starfi meðan á leikunum stóð. Sá hasar endaði með því að Wilbek varð að víkja úr starfi sem íþróttastjóri danska handknattleikssambandsins.

„Það mál hafði áhrif á ákvörðunina. Ég verð að segja það alveg eins og er. Ég mun annars ekki tjá mig frekar um það mál. Ég hef annars átt mjög gott samstarf við leikmenn sem hafa staðið með mér oftar en einu sinni. Það skiptir mig öllu máli,“ segir Guðmundur en býst hann við því að klára samninginn þar sem þessi ákvörðun er tekin svona löngu áður en samningurinn rennur út?

„Ég býst við því að klára samninginn. Frá minni hendi er það ekkert vandamál. Ég lenti í þessu sama hjá Rhein-Neckar Löwen áður en ég kom hingað og það hafði engin áhrif. Ég mun halda áfram að vinna eins og ég hef alltaf gert. Þannig vinna fagmenn.“

Guðmundur segist ekki vera búinn að ráða sig í aðra vinnu og framhaldið er algjörlega óráðið hjá honum. Svo gæti hreinlega farið að hann hætti í handboltaheiminum og snúi sér að öðru.

„Ég er opinn fyrir ýmsu. Ég mun skoða hvað kemur til mín úr handboltaheiminum en það gæti líka vel farið svo að ég hætti í handbolta. Ég er opinn fyrir því að skoða stjórnundarstöður og jafnvel hjá einhverju fyrirtæki á Íslandi. Það er samt ekkert á borðinu hjá mér núna sem er ekki óeðlilegt þar sem þetta kom bara út núna. Ég mun skoða allt.“

Enginn handboltaleiði

Guðmundur og fjölskylda hafa búið á Íslandi allan þann tíma sem hann hefur stýrt danska landsliðinu og er ekkert fararsnið á þeim. Þjálfarinn segir að það sé þó ekki kominn neinn handboltaleiði í hann.

„Ég get ekki sagt það. Ég var að koma úr tveimur leikjum með danska liðinu og ég nýt mín alltaf á hliðarlínunni. Þá var ég samt búinn að taka ákvörðun. Þá fann ég að ég nýt þess enn að þjálfa,“ segir Guðmundur en hann hefur þjálfað bæði félags- og landslið. Hvort heillar hann meira að gera í framtíðinni fari svo að hann verði áfram í handboltanum?

„Það er mjög góð spurning. Það fer eiginlega eftir því hvaða lið er um að ræða. Ég er opinn fyrir hvoru tveggja. Þetta hefur allt sína kosti og galla. Þetta myndi því snúast meira um liðið.“

Guðmundur er hugsanlega ekki eini íslenski þjálfarinn sem er að yfirgefa landslið. Dagur Sigurðsson er nefnilega sagður vera á förum frá þýska landsliðinu. Myndi það heilla Guðmund að stýra þýska landsliðinu?

„Ég hef ekkert velt því fyrir mér. Ég mun bara skoða það sem kemur til mín en ég hef ekki velt þýska liðinu neitt fyrir mér enda er ég nýbúinn að taka ákvörðun um framhaldið hjá Dönum.“