Setti síma stúlku inn á sig og reyndi að fá hana til að snerta sig á kynfærasvæðinu

Hæstiréttur staðfesti í dag dóm Héraðsdóms Austurlands yfir karlmanni sem dæmdur var fyrir kynferðisbrot gegn 14 ára stúlku.

Var hann ákærður í tveimur liðum, fyrir að hafa sent stúlku fæddri 1999 tvær myndir af getnaðarlimi með forritinu Snapchat í síma stúlkunnar. Einnig var hann ákærður fyrir að hafa í aftursæti bifreiðar sinnar reynt að fá stúlkuna til að fara með hendurnar inn fyrir buxur ákærða á kynfærasvæði.

Var hann sakfelldur fyrir seinni liðinn en í dómi héraðsdóms kemur fram að hann hafi sett síma stúlkunnar inn á sig og sagt henni að hún yrði að sækja hann þangað. Í framburði stúlkunnar fyrir dómi kemur fram að hann hafi reynt að fá stúlkuna til að sækja símann í um tíu mínútur áður en hann gafst upp.

Héraðsdómur sýknaði hinsvegar manninn af því að hafa sent stúlkunni myndir af getnaðarlim í gegnum Snapchat.

Hlaut maðurinn 45 daga fangelsi en var litið til ungs aldurs hans þegar brotið var framið en fullnustu refsingarinnar er frestað og fellur hún niður að liðnum tveimur árum, haldi maðurinn almennt skilorð.

Dóm Hæstaréttar má lesa í heild sinni hér.