Mesta hækkun í langan tíma í kauphöll Íslands

Í dag varð mesta hækkun á úrvalsvísitölu Kauphallar Íslands á einum degi frá því í október árið 2014 og hækkaði hún um 3,26 prósent. Forstjóri Kauphallarinnar segir gengi íslenskra hlutabréfa í vaxandi mæli fylgja þróuninni á alþjóðlegum mörkuðum.

Eftir töluverða svartsýni á íslenskum hlutabréfamarkaði í síðustu viku tók markaðurinn heldur betur kipp í dag með einni mestu hækkun á úrvalsvísitölunni á einum degi í langan tíma. Gengi hlutabréfa í Icelandair Group tók líka kipp með einni mestu hækkun á hlutabréfum í félaginu síðast liðinn fimm ár við lokun Kauphallarinnar í dag.

Gengi hlutabréfa í Marel hækkaði mest í dag eða um 4,25 prósent og fast á eftir kom hækkun bréfa í Icelandair Group um 3,67 prósent. Mikið flökt hefur hins vegar verið á gengi hlutabréfa frá áramótum og í síðustu viku lækkaði gengi bréfa í flestum fyrirtækjum í Kauphöllinni, til að mynda um 11,6 prósentustig í Icelandair Group, eins og sést á meðfylgjandi mynd.

„Já það eru búnar að vera meiri sveiflur en við höfum átt að venjast. Að minnsta kosti svona eitt til tvö ár. Kannski ekki óvenjulegar í þegar litið er til lengri tíma og yfir hlutabréfamarkaði á alþjóðavettvangi en meira en við höfum átt að venjast,“ segir Páll Harðarson forstjóri Kauphallar Íslands.

Frá áramótum hefur verið meira keypt og selt af hlutabréfum daglega en að meðaltali á síðasta ári. Úrvalsvísitalan hækkaði um 3,26 prósent í dag en hún hefur aðeins í tvígang hækkað meira á einum degi undanfarin sex ár.

Dagleg viðskipti eru nú að meðaltali um 3,4 milljarðar, tæplega hálfum milljarði meiri en að meðaltali á síðasta ári. Íslenski hlutabréfamarkaðurinn var dapur í langan tíma eftir efnahagshrunið en nú segir Páll hann í vaxandi mæli fylgja sveiflum á alþjóðlegum hlutabréfamörkuðum.

„Og dagurinn í dag er ágætt dæmi um það. Markaðir í Evrópu hafa verið á uppleið og við sömuleiðis,“ segir Páll.

Til að mynda hafi ástandið í Kína þar sem hlutabréf hafa lækkað mikið í verði að undanförnu haft áhrif hér.

„Ég held að þetta séu sömu kraftar sem eru hér að verki. Þetta eru áhyggjur af alþjóðlegu efnahagsástandi og það skiptast á svartsýni og bjartsýni,“ segir Páll Harðarson.