Bjóða hælisleitendum í áramótafögnuð í Ráðhúsinu

Þórunn Ólafsdóttir, formaður Akkeris og handhafi Mannréttindaverðlauna Reykjavíkurborgar þetta árið, stendur ásamt hópi sjálfboðaliða fyrir áramótafögnuði og notalegri samverustund fyrir hælisleitendur í Ráðhúsi Reykjavíkur í kvöld frá klukkan átta til eitt.

Fyrsti viðburður Akkeris á Íslandi

Þetta er í fyrsta skipti sem Akkeri stendur fyrir þess konar samverustund hér á landi en í sumar héldu þau samverustund í Grikklandi fyrir flóttafólk og fögnuðu þar Eid hátíðinni sem er hátíð sem markar lok Ramadan. Akkeri náði þá á 48 tímum að safna pening til að geta gert flóttafólkinu glaðan dag og hélt heljarinnar matarboð með dúkuðum borðum og þriggja rétta máltíð. Eftir að hafa upplifað þessa ótrúlegu gleði sem þar ríkti og auðveldað flóttafólkinu að gleyma stað og stund og gert þeim kleift að upplifa sig sem manneskjur, ákvað Þórunn að halda áfram með þess konar verkefni og standa að áramótafögnuðinum í kvöld.

„Áramótin eru stór hátíð og mikil tímamót í hugum okkar flestra og það eru takmörkuð tækifæri fyrir hælisleitendur að halda upp á slíkt þar sem þau búa hérna við misgóðar aðstæður. Okkur datt því í hug að þetta yrði góð leið að sýna fólki stuðning og bjóða það velkomið og búa til eitthvað svolítið fallegt í anda þessara tíma,“ segir Þórunn.

Heilmikið verður um að vera þessa kvöldstund og munu Magga Stína, Megas og Margrét Blöndal stíga á stokk og vera með skemmtiatriði. Ekki verður haldin sérstök flugeldasýning og því verður flugeldasýning íbúa miðborgarinnar látin duga enda Íslendingar með endæmum sprengiglöð þjóð.

Þórunn nefnir að boðið verður upp á eyrnatappa fyrir hælisleitendurnar. Lagt verður upp með að útskýra fyrir þeim sprengigleði landans, enda sé þarna fólk sem hafi upplifað stríðsátök og því geti það verið viðkvæmt fyrir sprengingunum.

Rútur sækja boðsgesti

Búist er við að fjöldi hælisleitenda muni koma í fögnuðinn en Þórunn segist ekki vita nákvæmlega hver fjöldinn verði. Hún nefnir að um 800 hælisleitendur séu staðsettir á höfuðborgarsvæðinu og nágrenni og að þau hafi auglýst viðburðinn í híbýlum þeirra. Þórunn segir að þau sem standi að boðinu séu búin að fá rútu að láni og ætla sér að sækja boðsgesti og keyra þá beint að dyrum og inn í áramótagleðina. 



Því má sjá að margt er lagt á sig til að þessi fögnuður verði að veruleika.

„Ég var sjálf veðurtæpt út á landi og keyrði í bæinn í fyrradag á bílaleigubíl til að ná þessu,“ segir Þórunn og bætir við að það hafi samt ekkert stress verið í kringum þetta allt saman. 

„Það magnaða við þetta er að þetta hefur aldrei verið stress því um leið og ég kastaði þessari hugmynd út í kosmosið þá byrjaði þetta bara að gerast af sjálfu sér.‘‘ 

Allir leggja hönd á plóg

Mörg fyrirtæki hafa styrkt Akkeri og Þórunn talar um að hægt sé að tala um landsátak í þeim málum. 50 manns eru í skipulagshópnum og þeir ásamt sjálfboðaliðum hafa unnið sleitulaust að því að gera þessa stund sem eftirminnilegasta. Boðið verður upp á smárétti, kökur, kaffi og drykkjarföng og búið er að gera aðstöðu fyrir börnin sem mæta. Þar geta þau leikið sér og horft á kvikmyndir.

„Reykjavíkurborg lét okkur eftir Ráðhúsið og við verðum hérna í Tjarnarsalnum,“ segir Þórunn. 

Þörf á endurbótum í málefnum hælisleitenda

Nú taka við nýir tímar hjá Þórunni þar sem hún er flutt heim í bili. Hún ætlar að halda áfram að efla starfsemi Akkeris og sjá samtökin blómstra hér heima enda sé ávallt þörf á samtökum sem vilja auðvelda og hjálpa flóttafólki. Þórunn nefnir að aðstaða flóttamanna hér á landi sé ekki upp á marga fiska og að margt þurfi að bæta. 

„Ég verð eiginlega að segja að mér finnst kerfið hérna ofboðslega illa undirbúið. Nú höfðum við forskot í rauninni. Þegar að flóttafólk fór að streyma inn í Evrópu þá held ég að það hafi liðið allavega ár þangað til að við fórum að sjá mikla aukningu. Mér finnst hvorki stjórnvöld né kerfið hérna heima hafa sótt þá þekkingu sem var til staðar á meginlandi Evrópu. Þetta virðist hafa komið öllum svolítið á óvart. Svo er kerfið ofboðslega hægt. Fólk býr við slæmar aðstæður,“ segir Þórunn og nefnir að sjálfboðaliðum séu jafnvel settar hömlur af útlendingastofnun og meini þeim aðgang inn í miðstöðvar Hælisleitanda. Þórunn leggur áherslu á að almenningur sé duglegur að standa sig og að mikil samstaða sé með flóttafólki í samfélaginu.

Þetta stefnir því allt í ljúfa áramótakvöldstund í Ráðhúsinu og víst er að Akkeri og sjálfboðaliðar munu gleðja mörg hjörtu og senda sáttar sálir inn í nýja árið.

Rætt var við Þórunni í hádegisfréttum Stöðvar 2 á gamlársdag.