Uppgjöf að boða til kosninga

Guðni Th. Jóhannesson, forseti Íslands, segist í samtali við fréttastofu trúa því að mynduð verði ríkisstjórn og til þess eigi að leita allra leiða. Ef ekki tekst að mynda meirihlutastjórn þá eigi að skoða minnihlutastjórn en hann segir að það sé ákveðin uppgjöf að boða til kosninga.

Bæði Bjarni Benediktsson, fjármálaráðherra og formaður Sjálfstæðisflokksins, og Sigurður Ingi Jóhannsson, forsætisráðherra og formaður Framsóknarflokksins, hafa opnað á umræðuna um að boða til kosninga að nýju. Benedikt Jóhannesson, formaður Viðreisnar, benti á það fyrir fjórum dögum að það væri andskotann ekki neitt að frétta af viðræðum um stjórnarmyndun. Sjálfstæðisflokkurinn, VG og Píratar hafa fengið stjórnarmyndunarumboðið en ekki tekist að mynda starfhæfa ríkisstjórn.

„Ég myndi ætla að fyrst yrði leitað allra leiða til að mynda ríkisstjórn á grundvelli þess þings sem nú situr. Að mínu mati skyldi ekki útiloka kosningar en eins og sakir standa núna fælist í því ákveðin uppgjöf. Hvað ef illa gengi líka við næstu kosningar?“ segir Guðni.

Forseti Íslands segist hafa ákveðið að bíða með næstu skref varðandi stjórnarmyndunarumboð eftir að Birgitta Jónsdóttir, þingflokksformaður Pírata, skilaði umboðinu. Það hefði getað truflað bæði þingstörf og stjórnarmyndunartilraunir ef þingmenn hefðu þurft að eiga við bæði verkefnin á þeim stutta tíma sem Alþingi hafði til að setja fjárlög.

Sigurður Ingi sagði fyrir viku að ef ekki tækist að mynda meirihlutastjórn á þeim dögum sem eftir eru af árinu þurfi að mynda minnihlutastjórn. Starfaði slík stjórn til skemmri tíma þyrfti að ganga aftur til kosninga.

Guðni bendir á að gott sé að spyrja hvað tæki við ef niðurstaða úr kosningum yrði sú sama. „Það kemur til álita að kjósa að nýju en mér finnst samt að menn eigi að einbeita sér að því að finna fyrst meirihlutastjórn, svo minnihlutastjórn sem njóti stuðnings og takist það ekki, þá skoðum við stöðuna.

En ég trúi því ekki fyrr en ég tek á því að þinginu takist ekki að mynda starfhæfa stjórn. Alveg eins og samstarfsandinn síðustu daga sýndi þá er á þingi núna fólk sem vill í einlægni leita lausna og þess vegna leyfi ég mér að vera bjartsýnn yfir hátíðirnar.“

Fréttin birtist fyrst í Fréttablaðinu