Verð á flugeldum í nágrannalöndum lægra en á Íslandi

Þrátt fyrir að verð hafi lækkað á flugeldum á Íslandi frá því í fyrra er verðlag á flugeldum hér hátt, að minnsta kosti ef tekið er mið af verðlagi í nágrannalöndum okkar Þýskalandi og Bretlandi.

Ef gerður er verðsamanburður má sjá að verðin í Þýskalandi eru mun lægri en hér á landi. Sem dæmi má nefna að skottertur á vefversluninni Pyroland.de kosta á bilinu 5 – 180 evrur, eða frá um 590 – 21.300 íslenskar krónur. Sú dýrasta, sem kostar 180 evrur er hundrað skota terta sem inniheldur tvö kíló af sprengiefnum.

Hjá Flugeldamörkuðum björgunarsveitanna kostar ódýrasta tertan 1.000 krónur en sú dýrasta, blönduð kaka með þremur kílóum af púðri, kostar 72.9000 krónur. Kaka sem er sambærileg við dýrustu tertuna á þýsku síðunni kostar 32.900. Því er verðmunurinn á einni vöru yfir 10.000 krónur.

Verðmunur er einnig á rakettum og öðrum smærri flugeldum. Til að mynda kosta þrjár stórar rakettur 25 pund, eða um 3.500 krónur, á breskum flugeldasöluvef en ein stór raketta á íslenska vefnum Flugeldasala.is kostar 2.900.

Tíu rakettur í pakka kosta að sama skapi 10 evrur, eða um 1.200 krónur hjá þýsku vefversluninni Pyroland.de á meðan sambærilegur pakki kostar 6.900 krónur hjá versluninni Flugeldasala.is.

Verðmunurinn stafar af háum flutningskostnaði og ólíku púðurmagni flugeldanna

Að sögn Jóns Inga Sigvaldasonar, sölu- og markaðsstjóra hjá Slysavarnafélaginu Landsbjörgu, stafar verðmunur á flugeldum á milli Íslands og nágrannaríkjanna meðal annars af því að púðurmagn í skoteldunum er yfirleitt meira hér á landi.

Í Evrópu er óheimilt að selja tertur með púðurmagni yfir einu kílói og því eru stærstu terturnar í Evrópu mun minni en stærstu terturnar hér á landi. Tertan sem seld er á þýsku vefsíðunni og tekin var hér að ofan sem dæmi er því strangt til tekið ólögleg þar í landi en þess má geta að hún var eina skottertan á síðunni sem innihélt púðurmagn yfir einu kílói.

Ný reglugerð mun ganga í gildi þann 15. janúar á næsta ári þar sem samskonar takmarkanir verða teknar upp hér á landi. Eru þetta því síðustu áramótin þar sem tertur með púðurmagni yfir einu kílói eru seldar á íslenskum markaði. 

Jón Ingi telur að hár innflutningskostnaður og virðisaukaskattur spili einnig inn í. Flugeldar eru fluttir til Íslands frá Kína í gegnum Evrópu. „Það er álíka dýrt að flytja flugeldana á milli Evrópu og Íslands og að flytja þá frá Kína til Evrópu. Slíkt hækkar verð á flugeldum hér á landi.“ Hann bendir jafnframt á að virðisaukaskattur er talsvert hár hér á landi.

Aðspurður um hvort fríverslunarsamningurinn við Kína, sem tók gildi 2014, hafi haft einhver áhrif segir Jón Ingi að svo sé. „Já, hann hefur haft jákvæð áhrif á verðlag flugelda hér á landi, það er alveg ljóst.“