Margar ástæður fyrir verðhækkunum á flugeldum

Markaðs- og sölustjóri Landsbjargar segir margar ástæður vera fyrir verðhækkunum á flugeldum undanfarin ár. Þær séu til komnar vegna breytinga á vörunum, hækkun á kostnaði frá Kína, dýrari innflutningi og nýrrar reglugerðar um vottanir, svo eitthvað sé nefnt.

„Á tveggja til fjögurra ára fresti gerum við breytingar á innihaldi á okkar aðalvörum án þess að breyta nafni vörunnar. Þetta gerum við meðal annars vegna kröfuharðara kaupanda og ýmissa nýjunga sem koma reglulega frá Kína og við viljum setja í okkar vörur,“ segir Jón í bréfi til Vísis.

Fyrr í dag birti Vísir yfirlit yfir verðmun á helstu vörum flugeldasölunnar frá 2010 til 2015.

Sjá einnig: Flugeldar hækka langt umfram verðlag

Jón segir að breytingarnar á innihaldi pakka og terta hafi orðið til þess að verðið hækkaði. Meðal annars hafi vörur sem áður voru seldar sér, settar í pakka.

Verð frá framleiðendum hefur hækkað samkvæmt Jóni, vegna krafna um aukin gæði, öryggi og útlit. Þá hafi launahækkanir einnig skilað af sér verðhærri vöru. Einnig hafa kröfur verið auknar um öryggi í flutningi á sprengiefnum í Kína og við það hefur kostnaður aukist bæði hjá höfnum, skipafélögum og landflutningi. Þá sé til dæmis gerð krafa um það hér heima að allir bílstjórar hafi ADR réttindi sem sé mjög kostnaðarsamt.

Að lokum segir Jón að samkeppni í sölu flugelda sé gríðarleg og hafi sennilega aldrei verið meiri. Því verði að verðleggja vöruna eftir því og ekki sé hægt að leyfa sér óeðlilegar verðhækkanir.