Viðskipti innlent

Óvissa um fjármagn og orku seinkar sólarkísilverksmiðju

Kristján Már Unnarsson skrifar
Ákvörðun Silicor Materials um sólarkísilverksmiðju á Grundartanga hefur verið frestað vegna óvissu um fjármögnun og orkuöflun. Ráðamenn bandaríska fyrirtæksins vonast þó til að framkvæmdir hefjist næsta vor. Þetta kom fram í fréttum Stöðvar 2 í viðtali við Davíð Stefánsson, talsmann Silicor Materials á Íslandi. 

Áform um verksmiðjuna voru kynnt opinberlega vorið 2014 þegar fulltrúar Silicor og Faxaflóahafna undirrituðu viljayfirlýsingu á Grundartanga um að fyrirtækið fengi lóð á Katanesi, austan álvers Norðuráls. Snemma á þessu ári vonuðust ráðamenn þess til að framkvæmdir hæfust í haust en nú hafa þeir lýst því yfir að fjármögnun tefjist fram á vor. 

„Þetta eru stórar fjárhæðir. Þetta er flókið samspil margra mjög ólíkra aðila. Þetta tekur einfaldlega meiri tíma en menn eru að gera ráð fyrir,“ segir Davíð.

Davíð Stefánsson, talsmaður Silicor Materials á Íslandi.Stöð 2/Sigurjón Ólason.
„Menn eru að reyna að spenna sig og reyna að ná þessu á ákveðnum tímapunkti. En svo reynist það bara ekki raunhæft. Það þarf einfaldlega lengri tíma í að ljúka þessu.“ 

Verksmiðju Silicor er ætlað að hreinvinna kísil til nota í sólarrafhlöður en hráefnið kemur frá kísilverum eins og þeim sem nú rísa á Húsavík og í Helguvík. Með samningi við Orku náttúrunnar er Silicor búið að tryggja sér um helming þeirra raforku, sem verksmiðjan þarf, en ræðir við Landsvirkjun um það sem á vantar.

„Þeir segjast í þröngri stöðu og þá er verið að tala um orkuöflun sem nær þá fram á 2019-2020. Þeir gera ekki meira en það sem þeir hafa. Þeir eru bundnir í samningum við aðra. En við erum sem sagt í viðræðum við þá og vonandi klárast það með réttum hætti,“ segir Davíð um Landsvirkjun.

Terry Jester, forstjóri Silicor Materials, og Gísli Gíslason, hafnastjóri Faxaflóahafna, á lóðinni á Katanesi við Grundartanga vorið 2014.Stöð 2/Björn Sigurðsson.
Þetta er raunar ein stærsta einstaka atvinnufjárfesting sem áformuð er hérlendis, upp á einn milljarð dollara, eða um 110 milljarða íslenskra króna, en gert er ráð fyrir 450 störfum í verksmiðjunni. Davíð segir menn vonast til að framkvæmdir hefjist næsta vor. 

„Silicor Material, og þeir sem stýra því fyrirtæki, eru að vonast til þess að það hefjist næsta vor. En nákvæmlega hvenær, - það hef ég ekki.“


Tengdar fréttir

Ég held að þetta sé allt lygi, segir Bubbi

Efnaverkfræðingur sem vann matsskýrslu vegna Silicor Materials á Grundartanga segir þetta einhverja hreinustu stóriðju sem um getur. Bubbi Morthens, tónlistarmaður og íbúi í Hvalfirði, segist ekki trúa þessu.






Fleiri fréttir

Sjá meira


×