Munurinn á nýjum samningi kennara og þeim sem voru felldir „10 til 15 þúsund kall“

„Við fyrstu sýn er þetta ekkert sérstaklega uppörvandi,“ segir Ragnar Þór Pétursson, trúnaðarmaður kennara í Norðlingaskóla, um nýja kjarasamninga kennara.

„Þetta virðist vera grunsamlega líkt samningnum sem er búið að fella tvisvar,“ segir Ragnar. Samningurinn kveður á um hækkun á launum grunnskólakennara um tæp ellefu prósent, eða 10,8 prósent, og að þeir fá tvö hundruð þúsund króna eingreiðslu.

Enginn stór munur

Samningurinn er til eins árs en eingreiðslan er uppbót fyrir þann tíma sem kennarar hafa verið samningslausir. Því er um að ræða tekjur sem grunnskólakennarar hefðu haft ef þeir hefðu samþykkt samninginn til að byrja með, en þeir hafa þess í stað verið á lægri launum í hálft ár vegna samningsleysis.

Í samningnum er kveðið á um rúmlega sjö prósenta hækkun sem tekur gildi strax og samningurinn er samþykktur og svo þriggja og hálfs prósents hækkun í mars næstkomandi.

„Það er enginn stór munur á þeim þannig lagað, nema gildistíminn, hann er styttri. Hugmyndin er væntanlega sú að það verði farin af stað einhver vinna sem á að skila meiri árangri til lengri tíma en það hefur ekkert komið fram sem gefur manni tilefni til að vera bjartsýnn á að það breyti einhverju,“ segir Ragnar.

„Munurinn þessum samningi og þeim samningum sem við felldum, þetta er 10 til 15 þúsund kall,“ segir Ragnar.

Almennur félagsmaður þarf góða kynningu

Það voru samninganefndir Félags grunnskólakennara og Sambands íslenskra sveitarfélaga sem skrifuðu undir samningana í gærkvöldi. Þeir verða síðan kynntir fyrir grunnskólakennurum næstu daga en síðan verða greidd atkvæði um hann daga 6. til 12. desember næstkomandi.

Ragnar Þór segir að nú þurfi hinn almenni félagsmaður í Félagi grunnskólakennara að fá kynningu á þessum samningi frá fyrstu hendi. „Ég veit að margir trúnaðarmenn eiga erfitt með að vita hvernig þeir eiga að kynna þennan samning svo vel verði,“ segir Ragnar sem veit ekki til þess að það séu einhver áform uppi um að stjórn Félags grunnskólakennara og samninganefndin kynni samninginn á opnum fundum.

Hætt við að kennarar felli

Hann segir hætt við því að kennarar felli samninginn. „Ef þeir samþykkja þetta þá er það ekki endilega vegna þess að þeir séu ánægðir með samninginn heldur að þeir óttist afleiðingarnar af hinu og svo standi menn við uppsagnirnar sínar og fari. Þessi samningur, hann leysir ekki vandann sem við stóðum frammi fyrir,“ segir Ragnar.

„Ef þetta verður samþykkt gæti verið svikalogn í tvo til þrjá mánuði, en svo gæti vel farið svo að fólkið sem hefur sagt upp yfirgefi skólana og þá verði þessi skaði sem var verið að reyna að fyrirbyggja með því að landa samningi núna. Það er ekkert víst að þessi samningur dugi til að bjarga því sem þurfti að bjarga, þó hann verði samþykktur.“