Nóvemberspá Siggu Kling – Bogmaðurinn: Hvatvísi er það besta sem þú getur haft

Elsku hjartans ylhýri Bogmaður. Ég vil að þú sjáir það skýrt að það fer þér betur að vera óstýrilátur en að fara eftir kerfinu í kringum þig. Það eiga náttúrulega að vera einhverjar reglur eins og ef það er hægri umferð í landinu, þá ekur þú ekki á vinstri akrein, og að vera tillitsamur við fólkið í kringum sig. Það er hægt að segja að það sé alveg á hreinu að þú sért góður við fólk.

Og það á eftir að margborga sig og þú munt sjá það skýrt og greinlega þegar janúar kemur að þú hefur fengið mikla uppskeru. Þú ert búinn að sá það miklum fræjum að þótt það vaxi ekki blóm upp af hverju fræi, þá skaltu skoða að það er svo margt að ganga vel þó að útkoman sé svolítið óljós. Það er í eðli þínu að lenda alltaf á fjórum fótum eins og kötturinn. Þannig að eftir því sem þú tekur meiri áhættu verður útkoman í lífssögu þinni svo miklu miklu skemmtilegri.

Ef þér finnst hafa verið lognmolla í kringum þig, þá ertu ekki í réttum takt við hjartslátt lífsins. Þá þarftu að skoða hvort þú sért að gera það sem þig dreymdi alltaf um að gera. Stundum finnst þér eins og þú vitir ekki ennþá hvað þú ætlar að gera þegar þú verður stór. Þú þarft ekki að vita það, því þú ert búinn að leggja góðan grunn að framtíð þinni. Svo haltu bara áfram á eins miklum hraða og þú getur, því þá líður þér best. Hvatvísi er það besta sem þú getur haft.

Því ef þú hugsar of mikið þá framkvæmir þú minna. Þessa orku skaltu samt ekki nota í ástamálunum. Því þú átt það til að vera svolítið ómannglöggur á fólk í þeim efnum. Þú átt eftir að finna mikinn metnað í því sem þú ert að gera og það nenna ekki allir að fylgja þér eftir í því. Það er best fyrir þig á næstunni að drífa af hluti sem þú hefur ekki sinnt nógu vel og hvíla þig svo aðeins meira.

Sofa betur og alls ekki fara í einhverja megrunarkúra eða setja ofurkraft í einhverja hreyfingu eða þess háttar. Því þú átt það til að keyra þig út og það getur nefnilega tekið kraftinn af því sem skiptir máli. Miklar breytingar eru í kringum áramót hjá þér og það er nú aldeilis stutt til áramóta. Svo taktu lífinu fagnandi því það er að gefa þér gjafir. Þolinmæði gagnvart öðrum í kringum þig og sjálfum þér eru lykilorð til þess að allt gangi eins vel og þú þorir að vona.

Frægir Bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collection, Steindi, Bryndís Ásmundsdóttir, leik- og söngkona, Jóhanna Vilhjálmsdóttir, fjallkona og leikkona, Logi Bergmann Eiðsson sjónvarpsmaður, Jói á Fabrikkunni, Sigga Dögg kynfræðingur, Hemmi, hársnillingur á Módus, Lovísa, hönnuður hjá Kjólar og konfekt.