Danir stungu af í seinni hálfleik

Ólympíumeistarar Dana unnu níu marka sigur, 29-20, á Hollendingum í undankeppni EM 2018 í handbolta í kvöld. Þetta var fyrsti leikur Dana eftir að þeir urðu Ólympíumeistarar í ágúst.

Lærisveinar Guðmundar Guðmundssonar voru allan tímann með yfirhöndina í leiknum en náðu ekki að slíta sig frá Hollendingum fyrr en í seinni hálfleik.

Staðan var 15-12 í hálfleik en í seinni hálfleiknum gaf danska liðið í og vann á endanum níu marka sigur, 29-20.

Mikkel Hansen var markahæstur hjá Dönum með átta mörk. Kasper Söndergaard kom næstur með fimm mörk.

Danir eru með tvö stig í riðli 1, líkt og Ungverjar sem báru sigurorð af Lettum í gær.

Þrír aðrir leikir fóru fram í undankeppni EM 2018 í kvöld.

Kristján Andrésson stýrði Svíum í fyrsta sinn þegar liðið vann 15 marka sigur, 36-21, Svartfellingum í riðli 6.

Frakkar rúlluðu yfir Litháa, 37-20, í riðli 7.

Þá unnu Serbar góðan útisigur á Pólverjum, 32-37, í riðli 2.