Klerkur tapaði meiðyrðamáli gegn mági barnsföður síns

Séra Hildur Björk Hörpudóttir kærði mág barnsföður síns, Sigurð Hjalta Magnússon, fyrir meiðyrði. Dómur var upp kveðinn í Héraðsdómi Reykjaness, af Söndru Baldvinsdóttur, á þá leið að ekki þættu næg efni til kærunnar. Bæði þurfa að borga málskostnað.

Séra Hildur Björk fór fram á milljón í miskabætur auk vaxta en ummælin, sem féllu á Facebook í upphafi þessa árs, komu fram í kjölfar þess að greint var frá því að Hildur Björk hafi verið skipuð prestur í Reykholti. Meðal þess sem farið var fram á að væri dæmt dautt og ómerkt er: „Sorgardagur fyrir Þjóðkirkjuna.“ Og: „Þjóðkirkjan ætlar að vígja tálmanamóður til prests.“ Ummælin vísa til forræðisdeilu Séra Hildar Bjarkar við barnsföður sinn en í dómsorði segir að ekkert hafi komið fram í umræddum ummælum sem ekki væri sannleikanum samkvæmt. Og hver maður væri frjáls skoðana sinna.

Í dómnum er forræðisdeilumálið reifað og vísað til mats sýslumannsins í Kópavogi þar sem fram kemur að Séra Hildur Björk hafi augljóslega tálmað umgengni barna við föður sinn. Þar var sérstaklega tekið fram að þær hömlur á samskipti barna og föður þeirra yrðu ekki taldar annað en brot á rétti barnanna til umgengni við föður sinn. „Þannig liggur fyrir að stefnandi hefur tálmað umgengni föður og barnanna og byggjast ummæli stefnanda um umgengnistálmanir á staðreyndum þar um. Þá fela ummæli hans um að skipun stefnanda í embætti prests væri sorgardagur, að það væri von stefnda að framganga hennar yrði á kristilegri og kærleiksríkari nótum og að hún hefði sjálf kastað rýrð á sig, í sér gildisdóm um stefnanda.“

Þá kemur jafnframt fram í dómi að Séra Hildur Björk Hörpudóttir hefur sjálf fjallað opinberlega um einkamálefni fjölskyldunnar, en hún kom frásögn sinni um meint ofbeldi föður barnanna á framfæri opinberlega.