Hvalur strandaði í Borgarvogi við Borgarnes

Hvalur hefur strandað í fjörunni á Borgarvegi við Borgarnes. Samkvæmt heimildarmanni Vísis er hvalurinn líklegast enn á lífi en lögreglan hefur lokað svæðinu af til þess að koma í veg fyrir að fólk hópist að hvalnum þar sem hann liggur á leirunum.

Hvalurinn, sem er um sjö metra löng hrefna, strandaði á áberandi stað en hann er sjáanlegur frá veginum inn í Borgarnes er keyrt er úr norðurátt, skammt fyrir neðan tjaldstæðið.

Hans Egilsson er einn af þeim sem komu auga á hvalinn í morgun en hann býr skammt frá. Hann telur að hvalurinn hafi líklegast komið með síðasta flóði en mikill munur er á flóði og fjöru á þessum slóðum.

 

Uppfært kl. 12:13

Samkvæmt lögreglunni í Borgarnesi er verið að meta hvort lóga eigi dýrinu. Það er hins vegar háð ákvörðun dýralækna þar sem dýrið er lifandi. Næsta flóð er seinni partinn í dag.