Eðlilegt ef hægt væri að kaupa nýjar íbúðir

„Okkar skyldur eru gagnvart verst setta og tekjulægsta hópnum og við þurfum að eiga íbúðir fyrir þennan hóp. Það er númer eitt, tvö og þrjú en þessar tillögur eru alveg þess virði að skoða,“ segir Ilmur Kristjánsdóttir, formaður velferðarráðs Reykjavíkurborgar, um nýtt úrræði sem Kópavogsbær kynnti í fyrradag í félagslegu íbúðakerfi bæjarins.

„Það þarf hins vegar að rýna vel í það hvort það sé yfirhöfuð skynsamlegt að lána fé til kaupanna úr borgarsjóði.“

Úrræði Kópavogsbæjar felst í því að bærinn býður leigjendum félagslegra íbúða sem eru komnir yfir viðmiðunartekjumörk að kaupa leiguíbúð sína, en hingað til hefur þurft að segja upp leigusamningi á slíkum tímamótum. Um leið býður bærinn þessum einstaklingum upp á 15% verðtryggt lán úr bæjarsjóði til að auðvelda fjármögnun íbúðarkaupanna. Á móti er gert ráð fyrir að kaupandinn taki 80% lán hjá fjármálastofnun og leggi fram 5% eigið fé. Bæjarsjóðslánið er verðtryggt og til 25 ára, en gert er ráð fyrir að það sé vaxta- og afborgunarlaust fyrstu 3-5 árin.

Í vandræðum með að kaupa íbúðir

„Þetta hefur verið rætt en við erum í vandræðum með að kaupa íbúðir,“ segir Ilmur um úrræðið. Hún bætir því við að það sé bagalegt að þurfa að segja upp leigusamningi við einstaklinga í félagslega kerfinu þegar hagur þeirra sé farinn að vænkast, en tekur þó fram að slíkt sé ekki algengt.

Ilmur minnir á að ef opnað verði á þann möguleika að félagslegar íbúðir séu seldar með sama hætti og í Kópavogi þurfi Reykjavíkurborg engu að síður að eiga áfram íbúðir fyrir þá tekjulægstu. Þetta eigi sérstaklega við um litlar einstaklingsíbúðir. 

„Ef það væri hægt að kaupa fleiri íbúðir þá þætti mér þetta mjög eðlilegur framgangur, ekki síst ef aðstæður á húsnæðismarkaði breytast,“ segir hún og ítrekar að meta þurfi vel hvort ráðlegt sé að lána fé úr borgarsjóði vegna þessa.

Nú þegar hefur einn einstaklingur keypt íbúð í Kópavogi í gegn um nýja úrræðið. Samkvæmt upplýsingum frá Kópavogsbæ hafa fleiri íbúar sýnt úrræðinu áhuga.