Forstjóri Íslandsstofu brattur: „Höfum alltaf lagt þá að velli“

„Hann er býsna svalur þessi gaur en hann á nú að vita betur eftir að við unnum þá í fótboltanum að það er ekki stærðin sem skiptir máli. Við höfum alltaf lagt þá að velli hvar sem við höfum mætt þeim.“ segir Jón Ásbjörnsson, forstjóri Íslandsstofu um ummæli Malcolm Walker, framkvæmdastjóra bresku verslunarkeðjunar Iceland fyrir helgi þar sem hann sagði nafnið Iceland í raun tilheyra verslunarkeðjunni.

Vísar Jón þar til frækins sigurs karlalandsliðsins í knattspyrnu á Englandi í EM í sumar en Íslandsstofa, ásamt öðrum hagsmunaaðilum, skoðar nú hvort höfða eigi mál til þess að krefjast ógildingar á skráningu bresku verslunarkeðjunnar Iceland á vörumerkinu Iceland í ríkjum innan Evrópusambandsins líkt og greint var frá í Fréttablaðinu í síðustu viku.



Sjá einnig:„Hvaða von eiga þeir eiginlega?“

Fyrir helgi var fjallað um málið á vef BBC ásamt öllum helstu fjölmiðlum Bretlands og sagði Malcolm Walker að Iceland ætti í raun betri kröfu á nafnið en Ísland. Sagði hann mun fleiri versla í verslunum Iceland en ættu heima á Íslandi. Taldi hann líklegt að stjórnvöld hér á landi væru að hnykla vöðvana í þessu máli vegna þess að kosningar væru framundan.

Gefur Jón, sem var í viðtali í Reykjavík síðdegis í dag, lítið fyrir þessar röksemdir Walker.

„Þó þeir hafi fimm milljónir kúnna og við séum bara þrjú hundruð þúsund þá er það ekki það sem skiptir máli,“ segir Jón sem telur ummæli Walker einkennast af hroka og ljóst sé að forsvarsmenn verslunarkeðjunnar hafi aldrei ætlað sér að semja við íslensk stjórnvöld vegna málsins.

„Þessi viðbrögð hans sýna manni svart á hvítu af hverju okkur hefur ekki tekist að ná neinu samkomulagi við þá um þessar skráningar. Þessi hroki sem hann sýnir sannar fyrir manni að þeir hafi aldrei ætlað að semja neitt við okkur eða gera okkur neitt gott til,“ segir Jón.

Sjá einnig: Vilja ógilda rétt á vörumerkinu Iceland

Málið má rekja til þess að Íslandsstofa hefur skráð vörumerkið Inspired by Iceland víða erlendis. Almennt hefur það gengið vel. Þó hafa borist andmæli þegar verið er að skrá vörumerkið fyrir vöruflokka sem skarast við þá vöruflokka sem vörumerki verslanakeðjunnar Iceland er skráð fyrir. Segir Jón að óttast sé að þessi andmæli Iceland geti haft áhrif á íslensk fyrirtæki sem vilji kenna sig við Ísland á erlendri grundu.

„Sú staða sem getur komið upp er að við getum ekki notað nöfn eins og Air Iceland, Iceland Sea Food eða nöfn á íslenskum fyrirtækjum sem tengjast þessu nafni okkar. Þeir gætu borið því við að þeir væru með skráningar sem hindruðu okkur í að nota þetta nafn. Það er sú staða sem að við óttumst,“ segir Jón sem telur að Bretar myndi hafa andmælt ef til dæmis bandaríska verslunarkeðjan Wal-Mart hefði verið látin heita nafni sem tengdist Bretlandi.

Sjá einnig: Nýta sér athyglina og vilja eiga vörumerkið

„Bretar myndu skilja þetta betur ef að þeim væri sagt hvað hefði gerst árið 1972 þegar Wal-Mart var skráð ef að fyrirtækið hefði ákveðið að kalla sig Britain eða British og svo meinað Bretum að nota það nafn. Ætli þeim myndi ekki finnast það svolítið sérkennileg staða að vera í, að mega ekki tengja sig við eigið land?“

Ráðgert er að íslenskir hagsmunaaðilar muni funda um næstu skref í málinu á miðvikudaginn.