Valt þrjátíu metra á Þorlákshafnarvegi og slapp með skrámur

Ökumaður missti stjórn á bifreið sinni á Þorlákshafnarvegi á milli Hveragerðis og Þrengslavegar á öðrum tímanum aðfaranótt sunnudags. Bíllinn valt um þrjátíu metra út fyrir veg en ökumaðurinn slapp með skrámur. Bifreiðin er gjörónýt. Ökumaðurinn er grunaður um að hafa verið undir áhrifum áfengis við aksturinn að því er segir í tilkynningu frá lögreglunni á Suðurlandi.

Í síðustu viku voru 44 ökumenn kærðir fyrir hraðakstur. Einn þeirra var sviptur ökurétti til bráðabirgða eftir að hafa verið mældur á 178 kílómetra hraða á leið austur Skeiðarársand á vegarkafla á móts við Háöldukvísl um kvöldmatarleytið á föstudag. Hann var færður á lögreglustöðina á Kirkjubæjarklaustri þar sem hann var yfirheyrður um meint brot og í framhaldi sviptur ökuréttindum. Mál hans verður sent ákæruvaldinu til frekari meðferðar.

Erlendur ferðamaður var kærður fyrir akstur utan vega á Skeiðarársandi austan við Gýgjukvísl. Lögreglu barst tilkynning um aksturinn. Lögreglumenn á Höfn náðu til mannsins sem játaði brotið og gekkst undir sektargreiðslu.

Seint á miðvikudagskvöld var lögreglan kölluð að fjölbýlishúsi á Selfossi vegna ölvunarláta og líkamsárásar. Þar hafði leigjandi í húsinu ráðist á leigusala sinn og veitt honum minni háttar áverka. Árásarmanninum var komið undir læknishendur vegna langvarandi áfengisneyslu sinnar.