Þórir og norsku stelpurnar unnu bronsið á sannfærandi hátt

Norska kvennalandsliðið í handbolta kemur heim með verðlaun frá Ólympíuleikunum í Ríó en liðið tryggði sér bronsverðlaun með sannfærandi tíu marka sigri á Hollandi í leiknum um þriðja sætið. Þetta eru áttu verðlaun liðsins undir stjórn Íslendingsins Þóris Hergeirssonar.

Þetta eru þriðju Ólympíuleikarnir í röð sem Noregur vinnur verðlaun en liðið hafði tekið gullið á tveimur síðustu ólympíuleikum. Bæði liðin höfðu tapað með minnsta mun í undanúrslitaleikjum sínum fyrir Frakklandi og Rússlandi sem spila um gullið á eftir.

Noregur vann leikinn 36-26 eftir að hafa verið sex mörkum yfir í hálfleik, 19-13, og ná níu marka forystu í báðum hálfleikjunum. Sigurinn var því mjög sannfærandi og öruggur.

Nora Mörk var enn á ný markahæst hjá norska liðinu en hún skoraði 7 mörk í þessum leik. Amanda Kurtovic og Stine Bredal Oftedal skoruðu báðar sex mörk og Veronica Kristiansen var með fimm mörk þar af þrjú þeirra í byrjun seinni hálfleiks.

Camilla Herrem sem klúðraði dauðafærin í lok framlengingarinnar í undanúrslitunum var með 4 mörk og 6 stolna bolta í leiknum. Heidi Löke skoraði líka fjögur mörk.

Norska liðið hafði unnið þrjá örugga sigra á hollenska liðinu á undanförnum stórmótum þar á meðal átta marka sigur í úrslitaleik HM í fyrra. Það var eiginlega greinilegt frá byrjun að trúin á sigur var ekki mikil innan hollenska liðsins. Norska liðið ætlaði aftur á móti að bæta fyrir sárt tap í framlengdum undanúrslitaleik á móti Rússum.

Norska liðið byrjaði leikinn líka á full gasi, komst í 7-2, 10-3 og náði mest níu marka forystu (14-5, 16-7 og 17-8) um miðjan hálfleikinn. Hollenska liðið náði að minnka muninn niður í sex mörk fyrir hálfleik en Noregur leiddi þá 19-13.

Norsku stelpurnar unnu fyrstu sex mínútur seinni hálfleiksins 4-1 og náðu þar með aftur níu marka forystu, 23-14. Hollenska minnkaði muninn reyndar fljótlega niður í sex mörk en þær norsku hleyptu þeim ekki lengra í bili. Munurinn fór reyndar niður í fimm mörk á síðustu tíu mínútunum en sigurinn var aldrei í hættu hjá norsku stelpunum sem komu muninum aftur upp í tíu mörk fyrir lokaflautið.

Þórir Hergeirsson hefur nú stýrt norska liðinu á níu stórmótum og unnið verðlaun á átta þeirra eða fimm gull, eitt silfur og tvö brons. Liðið er ríkjandi heims og Evrópumeistari og framundan er titilvörn á EM í Svíþjóð í desember.