Hágæða gjafasúkkulaði og konfekt framleitt af Verzlingum

Startup Reykjavik fer fram í fimmta sinn um þessar mundir. Tíu fyrirtæki hafa tekið þátt ár hvert. Fréttablaðið kynnti sér starfsemi þeirra fyrirtækja sem kynntu sig á PopUp & Pitch-kvöldinu á fimmtudaginn.

Yngsta teymið í Startup Reykjavík að þessu sinni er teymið á bak við Moon Chocolate. Það eru þau Lára Borg Lárusdóttir, Sveinn Ólafur Lúðvíksson, Áshildur Friðriksdóttir, Jórunn María Þorsteinsdóttir og Unnur Svala Vilhjálmsdóttir. Öll útskrifuðust þau frá Verzlunarskóla Íslands í vor.

Teymið kynntist í frumkvöðlaáfanga í skólanum og var Moon Chocolate valið fyrirtæki ársins 2016 í samkeppni ungra frumkvöðla, Junior Achievement, á Íslandi. 

Fyrirtækið framleiðir hágæðasúkkulaði sem er búið til frá grunni. „Þetta er hágæða gjafasúkkulaði, við erum að einblína á hönnun vörunnar með skemmtilegu útliti. Við viljum að þetta grípi augað,“ Lára Borg. Hún bætir við að hugað sé að siðferði við innkaup. „Við ætlum að fara meira út í konfekt, trufflur og páskaegg og aðrar árstíðabundnar vörur, við ætlum ekki bara að vera með súkkulaðistykki,“ segir Áshildur Friðriksdóttir.

„Við erum núna að reyna að koma framleiðslunni af stað, finna vélar, við vorum að finna húsnæði, og við erum að fá leyfi,“ segir Áshildur. „Við gerðum þetta fyrst hjá Ommnomm og fengum aðstöðu þar, nú þurfum við okkar eigin.“

Teymið er að hugsa fyrst um íslenska markaðinn en hyggur svo á útflutning.

Þau er sammála um að umhverfið hjá Startup Reykjavík sé mjög örvandi fyrir fyrirtækið. „Þau eru með ómetanlega reynslu sem við erum ekki með og þau eru að miðla henni til okkar, segir Lára Borg.

Stefnt er að framleiðslu í ágúst og mun teymið vera í fullri vinnu hjá fyrirtækinu í haust. Nú eru þau í leit að fjárfestum. „Það verður fjárfestadagur í lok ágúst og við munum þá flytja kynningu fyrir þá,“ segir Áshildur.

Viðtökur hafa verið jákvæðar fyrir hugmyndinni. „Það eru allir mjög spenntir að smakka,“ segir Sveinn.

Fréttin birtist fyrst í Fréttablaðinu þann 9. júlí