Foreldrarnir misstu af augnabliki Arnórs Ingva því þau voru á leiðinni á annað stórmót

Þau eru orðin vön því að fylgja krökkunum sínum á stórmót á Íslandi hvort sem er á Akranesi, Vestmannaeyjar eða Akureyri. Í sumar fylgdu þau elsta syni sínum á stórmót í Frakklandi. Þar sem hann sló í gegn. En þá voru þau reyndar farin á enn eitt stórmótið.

Una Kristín Stefánsdóttir og Trausti Már Hafsteinsson eru foreldrar Arnórs Ingva Traustasonar. Hetju Íslands í leiknum gegn Austurríki. Keflvíkingar og Njarðvíkingar gera bæði tilkall til Arnórs Ingva en móðir hans segir hann einfaldlega fyrsta flokks Reyknesbæing. Þau hafa fylgt Arnóri og landsliðsstrákunum eftir í Frakklandi, sáu leikina gegn Portúgal og Ungverjalandi en flugu heim daginn sem Ísland spilaði gegn Austurríki. 

„Við höfum fengið þá spurningu endurtekið, hvernig okkur datt í hug að fara heim,“ segir Una Kristín í samtali við Vísi. „Ég á fjögur börn,“ segir Una sem var mætt á Orkumótið í Eyjum þar sem Viktor Árni spilar með liði Keflavíkur.

„Það er bara flakkað á milli stórmóta,“ segir Una Kristín hress.

Litlu munaði að Una Kristín og fjölskylda missti af augnablikinu sem fæstir Íslendingar munu gleyma. Þegar Arnór Ingvi tryggði Íslandi sigurinn gegn Austurríki. Þau áttu flug heim frá Frakklandi þennan dag og hálftíma seinkun varð á fluginu, sem var ekki vinsælt.

„Við fylgdumst með stöðunni í fyrri hálfleiknum á netinu í vélinni,“ segir Una Kristín. Þegar lent var á Keflavíkurflugvelli tók við kapphlaup heim í sjónvarpsstofuna í Njarðvík þar sem horft var á seinni hálfleikinn.

„Þar var fullt af fjölskyldumeðlimum og svo komu bara allir öskrandi út úr öllum húsum. Áður en við vissum af fylltist húsið af nágrönnum og vinum,“ rifjar Una Kristín upp. Augljóst er að það hefur verið einstök og skemmtileg stund.

„Auðvitað hefði verið svakalega gaman að vera staddur á staðnum en maður veit aldrei hvenær tækifærið kemur. Svona er þetta.“

En það er þetta með tækifærið og Arnór Ingva. Hann kom ekkert við sögu í undankeppni EM en fékk svo tækifæri í æfingaliekjum í aðdraganda EM. Þrjú mörk í sjö leikjum á fjórum mánuðum tryggðu honum sæti í EM-hópnum. Og tölfræðin þar? Eitt mark á fjórtán mínútum, eitt eftirminnilegasta markið í sögu íslenskrar knattspyrnu.

Una Kristín segir að fjölskyldan fylgist grannt með Arnóri Ingva sama hvar hann spili. Þau séu með gervihnattadisk sem hafi hjálpað þeim að horfa á leiki stráksins með Norköpping í Svíþjóð og vonandi einnig sem flesta leiki Rapid Vínar, þar sem Arnór leikur á næstu leiktíð.

Arnór er dýrasti leikmaður í sögu félagsins, sem er eitt það stærsta í Austurríki. Ljóst er að hann hefur þegar skapað sér nafn þar í landi eftir sigurmarkið gegn, jú Austurríki.

„Það hefur verið þvílíkt skemmtilegt að fylgjast með þessu,“ segir Una Kristín stolt og maður heyrir á henni að fjölskyldan er enn að ná áttum. Enda reyndist ekki mikill tími til að meðtaka markið hans Arnórs í París.

„Við hentum einhverjum fötum ofan í tösku og drifum okkur til Eyja,“ segir Una. Þar hefur Viktor Árni fengið töluverða athygli út á velgengni bróður síns en þeir bræðurnir þykja ansi líkir.

„Bæði í útliti en líka í metnaði,“ segir móðirin. En það er fleira afreksfólk á sviði íþrótta í fjölskyldunni. Samúel Þór Traustason, átján ára bróðir Arnórs, spilar með meistaraflokki Keflavíkur og hefur þegar spilað í Pepsi-deild karla. Þá er Hjördís Lilja fjórtán ára á fullu í körfubolta með Keflavík og verið í yngri landsliðum þar.

Viktor Árni og Hjördís Lilja voru á leikjunum gegn Portúgal og Ungverjalandi en það verður Samúel sem fær að fylgja foreldrum sínum til Nice þar sem liðið mætir Englandi á morgun.