Vinna við frumvarp gegn fjármagnsinnflæði tefst

„Við sögðum að þetta þyrfti að koma fyrir almenna losun hafta og kannski æskilegt að það hefði verið í kringum útboðið. Af því þetta var orðið svo mikið, allt sem þurfti að gera í undirbúningi þessara laga og því um líkt, reyndist það ekki mögulegt,“ segir Már Guðmundsson seðlabankastjóri um frumvarp sem veita á Seðlabankanum heimild til að taka á vaxtamunarviðskiptum. Seðlabankinn tilkynnti í gær að stýrivextir yrðu óbreyttir, 5,75 prósent, en bindiskylda yrði lækkuð í 0,5 prósent í aðdraganda aflands­krónuútboðs sem fer fram þann 16. júní. Már sagði í gær að stefnt væri að því að stíga afgerandi skref varðandi afnám gjaldeyrishafta með haustinu.

Bjarni Benediktsson fjármálaráðherra hafði áður sagt að til stæði að leggja fram frumvarp um efnið á vorþingi.

Már talaði fyrir því, við kynningu Fjármálastöðugleika Seðlabankans í apríl, að heppilegra væri að bindiskyldu yrði beitt á innflæði fjármagns í stað skattlagningar sem einnig hafi komið til álita. Ókostur skattlagningarleiðar væri að bregðast þyrfti snögglega við aðstæðum á gjaldeyrismarkaði. „Þá þýðir ekkert að hlaupa niður í þing og biðja um að breyta skattinum,“ sagði Már, enda liggi skattlagningarvaldið hjá Alþingi. Hann nefndi sæm dæmi að féð sem bundið væri gæti orðið á núll prósent vöxtum og bundið í eitt ár. 

Fréttin birtist fyrst í Fréttablaðinu 2. júní