Vill að Íslendingar kaupi veiðiflugur á 52 milljónir

Jóhannes V. Reynisson, forsvarsmaður Bláa naglans, vill fá íslensku þjóðina í lið með sér til þess að setja heimset í dýrustu veiðiögnum heims. Hann vill hvetja þjóðina til að safna 52 milljónum króna fyrir þremur flugum sem útbúnar hafa verið fyrir verkefnið, að nafni Blue Fighter, Pink Hope, og Victory. Peningarnir yrðu svo nýttir til að kaupa þrjú blóðrannsóknatæki sem gefin yrðu Landspítalanum til að nýta sér við krabbameinsrannsóknir. Tækin kosta samanlagt 72 milljónir króna en búið er að safna rúmum nítján milljónum.

„Ég er búinn að hafa samband við Heimsmetabókina og við stefnum að því að hefja söfnunina þegar Evrópumeistaramótið byrjar og slútta henni þegar það er búið,“ segir Jóhannes og bætir við: „Við gætum hugsanlega átt Evrópumeistara í knattspyrnu en með þessu gætum við öll átt hlutdeild í að verða heimsmeistarar og eiga dýrustu flugur heims.“

Jóhannes segir að flugurnar hlytu þá að verða öflugustu flugur í heimi líka.

Hann segir framtíð krabbameinsrannsókna snúast um blóðið. „Á síðasta ári voru Bretar að fylgjast með konu sem var með breytingar á kjarnsýrum sem fóru í blóðið og þeir vissu að sýrurnar komu frá brjóstinu. Átta mánuðum síðar kom meinið fram í brjóstinu. Það segir manni eitt: Þegar þú ert búinn að skynja breytingarnar í blóðinu er hugsanlega hægt að gera við þennan litningagalla áður en meinið myndast,“ segir Jóhannes.

„Lið sem er í fremstu línu í krabbameinsrannsóknum er fjársvelt varðandi tæki, það er þetta sem Blái naglinn er að snúa sér að. Fólkinu sem er í fremstu víglínu. Að það hafi nóg af tækjum og fjármagni til að athafna sig,“ segir Jóhannes.

Fréttin birtist fyrst í Fréttablaðinu 6. júní