Þetta eru óhreinu Rússarnir

Alþjóðaólympíunefndin sagði heiminum frá því í síðustu viku að upp hafi komist að 31 íþróttamaður hafi notað ólögleg lyf á Ólympíuleikunum í Peking 2008 án þess að það uppgötvaðist þá. Nú er komið í ljós að 14 þeirra voru frá Rússlandi og hverjir þessir fjórtán eru.

454 sýni frá Ólympíuleikunum í Peking 2008 voru prófuð aftur með nýjustu tækni og þá kom í ljós að 31 óhreinn íþróttamaður hafði sloppið í gegnum lyfjaprófið.

Rússneska sjónvarpsstöðin Match ákvað að bíða ekkert með staðfestingu frá rússneska Ólympíusambandinu heldur birti nöfn þeirra fjórtán sem höfðu fallið á lyfjaprófi tæpum átta árum eftir að þau voru tekin.

Meðla þessara fjórtán eru fjölmargir verðlaunahafar frá Ólympíuleikunum í Peking 2008 þar sem Rússar unnu alls 73 verðlaun þar af 23 gull.

Rússneska Ólympíusambandið ætlar ekki að gefa þessi fjórtán nöfn út fyrr en að framkvæmt hefur verið próf á B-sýni viðkomandi íþróttafólks. Þau fara ekki fram fyrr en í júní.

Rússneska sjónvarpsstöðin Match hefur ekki gefið það upp hvaðan hún fékk upplýsingarnar um óhreinu íþróttamennina.

Rússneskir frjálsíþróttamenn eru í banni frá alþjóðlegum keppnum eftir að upp komst um vísvitandi svindl rússneska frjálsíþróttasambandsins og þessar fréttir eru ekki til auka líkurnar að þeir fái að vera með á Ólympíuleikunum í Ríó í ágúst.

Anna Chicherova er á listanum en hún vann brons í hástökki. Hún ætlar að fara með málið fyrir rétt verði niðurstaðan úr b-sýni hennar sú saman. „Ég skil ekki hvernig þeir fá þessa niðurstöðu. Kannski eru þetta mistök því ég er í sjokki eins og allir aðrir. Ég skil ekki hvernig þetta próf kom út jákvætt því ég hef farið í fjölda annarra lyfjaprófa," sagði Anna Chicherova í samtali við Match-sjónvarpsstöðina.

Hér fyrir neðan er listinn yfir þessa fjórtán óhreinu Rússa.

Julia Chermoshanskaya (Gull í boðhlaupi)

Mariya Abakumova (Silfur í spjótkasti)

Denis Alexeyev (Brons í 400 metra hlaupi)

Inga Abitova (Keppti í 10 þúsund metra hlaupi)

Yekaterina Volkova, (Brons í 3000 metra hindrunarhlaupi)

Nadezhda Evstyukhina (Brons í lyftingum)

Anastasia Kapachinskaya (Silfur í boðhlaupi)

Alexander Kornilov (Keppti í róðri)

Denis Nizhegorodov (Brons í 50 km göngu)

Alexandr Pogorelov (Keppti í tugþraut)

Tatyana Firova (Silfur í boðhlaupi)

Anna Chicherova (Brons í hástökki)

Maria Shainova (Silfur í lyftingum)

Ivan Jusjkov (Keppti í kúluvarpi)