Húsgoðsögn kemur til landsins í annað sinn

Plötusnúðurinn og upptökustjórinn Omid 16B er á leið til landsins og kemur fram á skemmtistaðnum Paloma laugardagskvöldið 28. maí. í boði útvarpsþáttarins og viðburðateymisins Elements en meðlimur þess, Ghozt eða Kristinn Bjarnason eins og hann heitir, mun spila sama kvöld auk þess sem Funktional Patt­erns á vegum Geysir Records munu koma þar fram.

Omid 16B ætti að vera mörgum Íslendingum kunnur en hann kom hingað til lands árið 2006, þá í för með Desyn Masiello og Demi en saman kalla þeir sig S.O.S. Þeir tróðu þá upp á Nasa fyrir rúmlega 900 manns og segir Kristinn Bjarnason að þar hafi farið fram eitt besta klúbbakvöld í sögu Nasa. Hann segir jafnframt að þeir Íslendingar sem ætli sér að mæta á stærstu tónlistarhátíðir landsins ættu að íhuga að mæta þetta kvöldið því að þarna verði veisla sem jafnist algjörlega á við þær hátíðir. Þarna verður Omid í minna rými en Nasa býður upp á og því pláss fyrir færri áhorfendur en að sama skapi verði nándin við listamanninn meiri.

Hinn bresk-íranski Omid Nour­izadeh eins og hann heitir réttu nafni hefur verið mikill áhrifavaldur í heimi progressive og hústónlistar. Hann, ásamt mönnum eins og Carl Craig, Vince Watson, Craig Richards, Mr C, Steve Bug og Francois K eru oft nefndir sem forsvarsmenn hins svokallaða „tech house“, sem er blanda af techno- og house-tónlist. Omid hefur stofnað þrjú útgáfufyrirtæki, Alola Records árið 1994, Disclosure árið 1995 og SexOnWax Recordings árið 2002. Hann hefur einnig gert vinsæl remix af lögum margra þekktra listamanna eins og Lönu Del Rey, The Cure, Gus Gus og Depeche Mode.

Aðspurður hverju fólk geti átt von á frá honum á Paloma á laugardagskvöldinu segir Omid að fólki verði komið verulega á óvart. „Ég mun spila sitt lítið af hverju þarna og mun auðvitað verða mjög móttækilegur fyrir stemmingunni hjá áhorfendum, en hún hefur alltaf mikil áhrif á mig og þá tónlist sem ég kýs að spila.

Þegar ég kom hingað til lands síðast varð ég gjörsamlega ástfanginn af íslenskum áhorfendum og hversu opnir og innblásnir þeir voru um það hvað þeir vildu heyra?… hvað meira getur maður beðið um?

Annars verð ég á landinu í tvo daga og við erum búin að taka frá einn dag í smá skoðunarferð. Planið er að skella sér í Bláa lónið en það veltur svolítið á því hvort íslenskir vinir mínir haldi mér vakandi alla nóttina, ekki það að ég sé á móti því að skemmta mér ærlega í þessari ferð, við sjáum hvað setur.“

Omid 16B verður á skemmtistaðnum Paloma á laugardaginn, 28. maí, og er miðaverð 1.500 krónur.