Hleypur í skarðið

Elma fer með hlutverk Ali, vinkonu Sophie, forvitnu dótturinnar ungu sem leitar uppruna síns. Hún býður þremur gömlum kærustum móður sinnar í brúðkaup sitt í því skyni að komast að því hver þeirra sé faðir hennar. Sagan er afskaplega rómantísk og óhætt að segja að gleðin og hamingjan ráði ríkjum í gegnum sýninguna.

„Ástæða þess að ég hoppa inn í hlutverkið þessa helgi er að Þuríður Blær Jóhannsdóttir, sem leikur Ali, er að sýna leikritið Mávinn eftir Tsjekhov á Kontakt-leiklistarhátíðinni í Póllandi nú um helgina. Hátíðin er ein af virtustu leiklistarhátíðum í heimi og hefur verið starfrækt síðan 1991 í borginni Thorun,“ segir Elma.

Eins og flestir vita er Mamma Mia! algjör gleðisprengja þar sem söngur, dans og gleði er allsráðandi í sýningunni.

„Ég kem til með að leika í fjórum sýningum og þurfti auðvitað að fá ljósar strípur í hárið og fór í brúnku­sprey; orðin sólbrún og sumar­leg,“ segir Elma hlæjandi og bætir við að hún fái aðstoð frá dansaranum og danshöfundinum Chantelle um helgina. Þar sem dansatriðin eru sum hver flókin skipta þær Chantelle dansatriðunum á milli sín.

Þó svo að Elma sé þaulvön að stíga á svið í hinum ýmsu hlutverkum er þetta í fyrsta skipti sem hún fer með hlutverk í söngleik.

„Vinkonutríóið tekur saman lagið Sæti, sæti, alveg frábært lag eins og reyndar öll lögin í sýningunni. Ég heillaðist strax af kvikmyndinni Mamma Mia! þegar hún kom út á sínum tíma og fannst hún alveg æðisleg. Það er ekki annað hægt en að fara í gott skap við að hlusta á þessi lög,“ segir Elma kát í bragði og bætir við að krakkarnir á heimili hennar séu með myndina í gangi allan daginn og elski hana.

Nóg er um að vera fram undan hjá Elmu. Leikárinu í Borgarleikhúsinu fer senn að ljúka en leikhúsið er byrjað að undirbúa sýningar næsta árs auk þess sem lokasýning Auglýsingar ársins eftir Tyrfing Tyrfingsson er nú á sunnudaginn en þar fer Elma með hlutverk dótturinnar.

„Það er alltaf svolítil spenna á vorin við að hefja undirbúning fyrir næsta vetur og ég er að sjálfsögðu spennt fyrir næsta leikári,“ segir Elma.