Persónulegt met í aldri

„Þetta er hæsta tala sem ég hef náð fram að þessu. Persónulegt met í aldri,“ segir Guðni Kolbeinsson þýðandi glaðbeittur þegar hann er spurður hvernig sjötugsafmælið fari í hann.

Hann svarar símanum austur í Selvogi, er þó á leið til Reykjavíkur en kveðst hafa stigið út úr bifreiðinni þegar ég hringdi. Svona er hann löghlýðinn borgari. En er orðið vorlegt í Selvoginum? „Já, já, það er bara notalegt. Það var samt bálhvasst hér í gærkveldi.“

Þar með upplýsir Guðni að hann hafi gist í sveitinni. „Já, ég var að reyna að veiða bleikju í Hlíðarvatni. Hvernig gekk? Ja, ég fékk í soðið. Maður verður nú að ráða við að gera að því sem maður veiðir!“ segir hann og frekari aflatölur fæ ég ekki.

En breytir það einhverju fyrir þýðanda að verða sjötugur? „Ekkert voða miklu,“ svarar hann og kveðst að mestu ráða tíma sínum sjálfur. „Ég hef reyndar undanfarin ár verið duglegur við að segja já þegar mér hafa verið boðin verkefni og hef haft ískyggilega mikið að gera – fyrir svona aldraðan mann! Ég er býsna önnum kafinn þessa dagana en samt er allt undir kontról.“

Hann kveðst sjaldan taka löng og mikil sumarfrí. „Ég fer á Hornstrandir í nokkra daga og í veiði í nokkra daga – allt frekar stuttar skreppur,“ upplýsir hann og kveðst heimsækja Hornstrandir árlega, þær séu í uppáhaldi. 

„Ég er ættaður úr Hælavík en þar eru bara tóftir sem hafið er að berjast við að taka frá okkur svo ég held dálítið mikið til í Hlöðuvík, næstu vík við. Þar er húsakostur og ég hef þar innhlaup. Reyni að fara með stórfjölskylduna að minnsta kosti annað hvert ár en sjálfur á hverju ári. Hallvarður Guðlaugsson, frændi minn frá Hlöðuvík, byggði þar hús, fyrst eitt og síðan tvö og sá um að ættin fengi að njóta.“

Hvernig ferðist þið þangað? Við leigjum okkur bát og siglum frá Bolungarvík, svo förum við með gúmmíbát síðasta spölinn. Landtakan er oft spennandi því það er hált í fjörunni.“

Afmæli Guðna er sem sagt í dag og hann kveðst ætla að halda „smá boð“ fyrir nánustu ættingja og vini. Heima? „Nei, reyndar er það nú í sal, nánustu ættingjar og vinir verða fljótt fjári margir.“

Greinin birtist fyrst í Fréttablaðinu 28. 5. 2016.