Útsýnisperla í Hafnarfirði til sölu á 110 milljónir

Við Hlíðarás í Hafnarfirði stendur afar glæsilegt 341 fermetra hús með stórum tvöföldum innbyggðum bílskúr til sölu á 110 milljónir króna.

Þessi gata í Hafnarfirði hefur að geyma fjöldann allan af afar fallegum húsum og útsýnið er dásamlegt. Sést allur fjallahringurinn sem umlykur höfuðborgarsvæðið, frá Bláfjöllum til Snæfellsjökuls. Umlukið ósnertri náttúru og fallegar gönguleiðir allt um kring, Ásfjall, Hvaleyrarvatn, Ástjörn, Helgafell og fleira.

Húsið er einstaklega vel skipulagt og með fallegum sérsmíðuðum innréttingum og flottum tækjum. Það er á tveimur hæðum og á neðri hæðinni eru þrjú svefnherbergi ásamt baðherbergi og fjölskyldurými. Stórt vaskhús og geymsla.

Á efri hæðinni er stórt svefnherbergi með fataherbergi og stóru baðherbergi með baði og stórum sturtuklefa innaf. Einnig er eitt barnaherbergi á efri hæðinni sem notuð er sem skrifstofa í dag. Gestasalerni og risastór stofa, borðstofa og eldhús, allt samliggjandi. Fallegur arinn, hannaður af Ingibjörgu Agnes Jónsdóttur innanhúsarkitekt, stendur í stofunni.

Timburverönd fyrir ofan hús sem snýr í suður. Einnig eru stórar svalir framan á húsinu útfrá eldhúsi þar sem tilvalið er að drekka morgunkaffið.